काठमाडौं । अख्तियार दुरुपयोग अनुसन्धान आयोगले पशुपतिनाथ मन्दिरमा राखिएको सुनको जलहरीमा भएको भनिएको अनियमितताबारे अनुसन्धान जारी रहेको जनाएको छ ।
पशुपतिनाथको जलहरीमा राखिएको सुनको जलहरीमा भएको अनियमितताबारे कुनै निष्कर्ष ननिकालिएको अख्तियारको उच्च स्रोतले जनाएको छ ।
२०७७ फागुनमा पशुपतिनाथको गर्भगृहमा राखिएको सुनको जलहरीमा अनियमितता भएको भन्दै अख्तियारमा उजुरी परेको थियो । पशुपति क्षेत्र विकास कोषका पदाधिकारीले बारम्बार सुन जोख्न चुनौती दिएपछि अख्तियार दुरुपयोग अनुसन्धान आयोगले असार १० गते जलहरीको सुन जोखेको थियो ।
अख्तियार दुरुपयोग अनुसन्धान आयोगले जलहरीको तौलको विषयमा कुनै आधिकारिक धारणा दिएको थिएन । तर पशुपति क्षेत्र विकास कोषले भने १०८ किलो सुन करिब तौलिएको र ५२ तोला सुन जोखेको ठाउँ सरसफाइ गर्दा भेटिएको दाबी गरेको थियो ।
जलहरीमा सुनको हिसाब नमिलेको भन्दै महालेखा परीक्षकको कार्यालयले समेत प्रश्न उठाएको थियो ।
