काठमाडौं । नवनिर्वाचित राष्ट्रपति रामचन्द्र पौडेलले भारतीय समकक्षी द्रौपदी मुर्मूलाई नेपाल भ्रमणको निम्तो दिएका छन् ।
राष्ट्रपतिमा निर्वाचित भएकोमा बधाई दिन भारतीय समकक्षी मुर्मूले गरेको टेलिफोन संवादका क्रममा पौडेलले नेपाल भ्रमणको निम्तो दिएका हुन् ।
भारतीय राष्ट्रपति मुर्मूले पौडेललाई राष्ट्रपतिमा निर्वाचित भएकोमा बधाई दिएकी हुन् । त्यसक्रममा पौडेलले पशुपतिनाथ दर्शनका लागि मुर्मूलाई निमन्त्रणा दिएको स्वकीय सचिव सुरेशचन्द्र चालिसेले जानकारी दिए ।
राष्ट्रपति पौडेलको नेतृत्वमा भारत–नेपाल द्विपक्षीय सम्बन्ध थप उचाइमा पुग्ने राष्ट्रपति मुर्मूले विश्वास व्यक्त गरेकी छन् ।
भारतको राष्ट्रपति भवनद्वारा जारी विज्ञप्तिमा भनिएको छ, ‘दुवै राष्ट्रपतिहरुले नेपाल र भारतबीचको विशिष्ट र बहुआयामिक सम्बन्ध रहेको उल्लेख गरे । उनीहरूले द्विपक्षीय सहयोगलाई अझ अगाडि बढाउने र हाम्रा दुई देशका जनताबीचको मित्रताको बलियो सम्बन्धलाई थप सुदृढ गर्ने उपायहरूबारे पनि छलफल गरे ।’
राष्ट्रपतिमा निर्वाचित भएपछि पौडेललाई अमेरिका, चीन, पाकिस्तानलगायत मुलुकहरुबाट बधाई तथा शुभकामना आइसकेको छ ।
