काठमाडौं । अमेरिकाले इजरायल हमाससँग युद्धविराम गर्न तयार रहेको दाबी गरेको छ । अमेरिकी राष्ट्रिय सुरक्षा सल्लाहकार जेक सुलिभानले इजरायली प्रधानमन्त्री बेन्जामिन नेतान्याहूसँग जेरुसेलममा भेटवार्ता गरेपछि इजरायल हमाससँग युद्धविराम गर्न तयार रहेको विश्वास व्यक्त गर्नुभएको हो ।
हमास पनि आफ्नो अडानबाट पछि हट्दै युद्धविरामप्रति लचिलो भएको अमेरिकी सञ्चारमाध्यमले दाबी गरेका छन् । युद्धविरामपछि गाजामा इजरायली सेनाको अस्थायी उपस्थितिको विषयमा हमासले सहमति जनाउन सक्ने बताइएको छ ।
यद्यपि हमासले अहिलेसम्म यस विषयमा कुनै औपचारिक जानकारी दिएको छैन । सुलिभानले लेबनान र इजरायलबीचको युद्धविरामले गाजा युद्धविराम वार्ताको अवरोध हटाएको बताउनुभएको छ ।
साथै हमासले पुनः सुरु हुने वार्तामा लचिलोपन देखाएको विश्वास व्यक्त गर्दै उहाँले इजरायल र हमास युद्धविरामनजिक पुग्ने सम्भावना देखापरेको बताउनुभएको छ ।
युद्धविराम ६० दिन अवधिको हुने प्रस्ताव गरिएको बताइएको छ । यस अवधिमा हमासले प्यालेस्टिनी बन्दीको रिहाइको बदलामा ३० भन्दा बढी इजरायली बन्धकहरूलाई रिहा गर्ने विषय उल्लेख छ । साथै इजरायलले गाजामा थप मानवीय सहायता प्रवेश गर्न अनुमति दिने विषय पनि समावेश छ ।
यसअघि, हमासले गाजाबाट इजरायलको पूर्ण फिर्ताका साथै स्थायी युद्धविराममा जोड दिँदै आएको थियो । विगतमा कतार, इजिप्ट र अमेरिकाले मध्यस्थता प्रयास गरे पनि स्थायी युद्धविरामको अडानका कारण असफल भएपछि इजरायल–प्यालेस्टिनी द्वन्द्व एक वर्षभन्दा बढी समयदेखि जारी छ ।
गत नोभेम्बर २७ मा हिजबुल्लाह र इजरायलबीचको युद्धविरामपछि हमासका अधिकारीले युद्ध रोक्न इच्छुक रहे पनि इजरायली पक्षबाट अवरोध रहेको बताएका थिए
