काठमाडौं । यस वर्षको साहित्यतर्फको नोबेल पुरस्कार दक्षिण कोरियाकी ५३ वर्षीया लेखक हान काङलाई प्रदान गर्ने घोषणा गरिएको छ ।
मानव जीवनका विपत्ति, उतारचढाव र नाजुकतालाई आफ्नो लेखनमार्फत् उजागर गरेकोमा लेखिका काङलाई यस वर्षको साहित्यतर्फको नोबेल पुरस्कार दिने निर्णय गरिएको स्वीडिश एकेडेमीले जनाएको हो ।
उहाँको अन्तर्राष्ट्रिय रुपमा चर्चा पाएको पहिलो उपन्यास ‘शाकाहारी’ अर्थात् ‘दि भेजिटेरियन’ नेपालीमा समेत अनुदित छ । उक्त उपन्यासले सन् २०१६ मा बुकर पुरस्कारसमेत पाएको थियो । उहाँले आफ्नो लेखनको सुरुवात सन् १९९३ बाट गर्नुभएको थियो । सन् २०२३ को साहित्यतर्फको नोबेल पुरस्कार नर्वेका लेखक जन फोसेले पाउनुभएको थियो ।
नोबेल पुरस्कारको राशि १ करोड १० लाख स्वीडिश क्रोनर अर्थात् १० लाख अमेरिकी डलर रहेको छ ।
