काठमाडौं । बेलायतमा हिजो सम्पन्न संसदीय निर्वाचनको मतगणना जारी छ भने एक्जिट पोलहरूले विपक्षी दल-लेबर पार्टीले भारी बहुमत ल्याउने प्रक्षेपण गरेका छन् ।
प्रारम्भिक मत परिणामले पनि त्यसै तर्फ संकेत गरेका छन् । संसद्का ६५० सीटमध्ये लेबर पार्टीले ४१० सिट जित्ने र सत्तारुढ कन्जरभेटिभ पार्टी १३१ सिटमा सीमित हुने एक्जिट पोलहरूले प्रक्षेपण गरेका छन् । यो परिणामले कन्जरभेटिभ पार्टी नेतृत्वको सरकारले विगत १४ वर्षदेखि गर्दै आएको शासनको अन्त्य गर्नेछ ।
लेबर पार्टीको भारी बहुमतपछि यसका नेता केइर स्टार्मर देशको नयाँ प्रधानमन्त्री बन्नुहुनेछ । वर्तमान प्रधानमन्त्री ऋषि सुनकको दल कन्जरभेटिभ पार्टी १३१ सिटमा सीमित हुनु इतिहासकै सबैभन्दा नराम्रो नतिजा हुनेछ । यसअघिको संसदीय निर्वाचनमा उहाँको दलले ३४६ सिट जितेको थियो ।
महँगाइ अन्तरपार्टी द्वन्द्व र राजनीतिक अस्थिरताका कारण कन्जरभेटिभ पार्टीले जनताको विश्वास गुमाएको विश्लेषण गरिएको छ । आन्तरिक द्वन्द्वकैब कारण २०१६ देखिको सत्ता संचालनमा कन्जरभेटिभ पार्टीले ५ जना प्रधानमन्त्री फेरेको थियो ।