बाजुरा । मंसिर १६ गते हुन लागेको उपनिर्वाचनका लागि बाजुराको स्वामीकार्तिक खापर गाउँपालिकामा मुख्य निर्वाचन अधिकृतको कार्यालय स्थापना गरिएको छ ।
शुक्रबार स्वामीकार्तिकको सुइजिउलामा मुख्य निर्वाचन अधिकृतको कार्यालय स्थापना गरिएको हो । गाउँपालिकामा रिक्त रहेको उपाध्यक्ष पदको निर्वाचनका लागि कार्यालय स्थापना गरिएको मुख्य निर्वाचन अधिकृत संजीव पोखरेलले जानकारी दिनु भएको छ ।
२०७९ को स्थानीय तहको निर्वाचनबाट निर्वाचित गाउँपालिकाकी उपाध्यक्ष मैनादेवी जोशीको २०८० माघ ४ गते निधन भएपछि रिक्त पदमा उप निर्वाचन हुन लागेको हो । पाँच वडा रहेको गाउँपालिकामा ९ वटा मतदान स्थल रहेका छन् ।
मंसिर १६ गते १८ वर्ष पुग्ने सात हजार ४६ जना मतदाताले उपनिर्वाचनमा मतदान गर्ने भएका छन् ।
