काठमाडौं । डिफेन्डिङ च्याम्पियन जनकपुर बोल्ट्सले नेपाल प्रिमियर लिग-एनपीएल २०२५ को मिनी अक्सनमार्फत् चार नयाँ खेलाडी भित्र्याउँदै आफ्नो ११ सदस्यीय स्वदेशी स्क्वाडलाई पूर्णता दिएको छ ।
अब बाँकी रहेका चार विदेशी खेलाडी र ट्यालेन्ट हन्टमार्फत् एक स्थानीय खेलाडी अनुबन्ध गर्दै टोलीलाई पूर्णता दिने तयारीमा जनकपुर बोल्ट्स छ । बलिङमा पहिल्यै पर्याप्त स्पिन गहिराइ भएकाले जनकपुरले विदेशी खेलाडीको छनोटमा पावर-हिटर, तीव्र गतिका बलर र गुणस्तरीय अलराउण्डरलाई प्राथमिकतामा राख्ने देखिन्छ । ट्यालेन्ट हन्टमार्फत् उदीयमान प्रतिभा भित्र्याउँदै उपाधि रक्षा गर्ने लक्ष्यमा जनकपुर आत्मविश्वासका साथ अघि बढिरहेको छ ।
रिटेन खेलाडी र मिनी अक्सनमा भित्र्याइएका नयाँ अनुबन्धहरूलाई हेर्दा जनकपुरले आफ्नो मूल संरचना कायम राख्दै सन्तुलित स्क्वाड निर्माणमा जोड दिएको स्पष्ट देखिन्छ । राष्ट्रिय टोलीका स्टार विकेटकिपर-ओपनर आसिफ शेखलाई मार्की खेलाडीको रूपमा राख्दै जनकपुरले कप्तान अनिल साह, शुभ कंसाकार, किशोर महतो, ललित राजवंशी, तुलबहादुर थापा मगर र रुपेश सिंहलाई पनि निरन्तरता दिएको छ ।
गत शनिबार सम्पन्न अक्सनमा 'सी' क्याटेगोरीबाट सचिन भट्ट २ लाख र आदित्य महतो ५ लाखमा अनुबन्ध भए भने 'बी' क्याटेगोरीबाट मयन यादवलाई ७ लाख ७५ हजार र बिकास अग्रिलाई ५ लाखमा भित्र्याइएको छ ।
३३ लाख रूपैयाँको पर्स बोकेर अक्सनमा पुगेको जनकपुरले जम्मा १९ लाख ७५ हजार खर्च गर्दा १३ लाख २५ हजार रूपैयाँ बचतमा राखेको छ । हालको स्क्वाडमा किशोर, बिकास र रूपेश मिडियम फास्ट आक्रमणमा छन् भने ललित र आदित्य लेफ्ट आर्म अर्थोडक्स, सचिन लेगब्रेक र तुलबहादुर लेफ्ट आर्म रिस्ट स्पिनका साथ बलिङमा विविधता ल्याइएको छ ।
ब्याटिङतर्फ शीर्षक्रममा आसिफ, अनिल र शुभजस्ता ब्याटर छन् भने मयनले मिडल अर्डर सम्हाल्न सक्छन् । आसिफ र अनिल दुई विश्वस्तरीय विकेटकिपर भएकाले विदेशी विकेटकिपरमा जनकपुरको चासो छैन ।
बरू मिडल अर्डरका पावर-हिटर, बायाँ हातका फास्ट बलर र सम्भव भए ब्याटिङ अलराउण्डर खोज्नु टिमको प्राथमिकता हुनेछ । गत सिजन ललित र किशोरको बलिङ जोडीले टिमलाई उपाधि दिलाउन महत्वपूर्ण योगदान दिएका थिए । र, यसपटक पनि त्यस्तै प्रदर्शनको अपेक्षा गरिएको छ ।
स्पिनरहरूमा ललित, आदित्य, सचिन र तुलबहादुर छन् । जसमध्ये ललितसँगै एक जनामात्र प्लेइङ-११ मा स्थान पाउने सम्भावना छ, बाँकी बेञ्चमा रहनेछन्। किशोर, बिकास र रूपेश फास्ट बलिङ विभागमा छन् ।
जहाँ रूपेशले इनिङ्सको अन्त्यमा आक्रामक ब्याटिङ गर्ने क्षमता पनि राख्छन् । तर मिडल अर्डर तथा लोअर मिडल अर्डरमा आक्रामक अन्त्य गर्ने खेलाडीको कमी देखिने भएकाले जनकपुरले विदेशी बजारबाट कम्तिमा दुई शुद्ध ब्याटर खरिद गर्नु पर्ने छ ।
एक स्पिन अलराउण्डर र एक फास्ट अलराउण्डर भित्र्याउन सके जनकपुरको टिम पूर्ण हुने छ ।
