काठमाडौं । चर्च ब्वाइज युनाइटेड काठमाडौं ताप्लेजुङ गोल्डकपको फाइनलमा प्रवेश गरेको छ । द यङ ब्रदर्स क्लब इटहरी सुनसरीलाई पेनाल्टी सुटआउटमा पराजित गर्दै चर्च ब्वाइज फाइनलमा पुगेको हो ।
बुधबार भएको पहिलो सेमिफाइनलको नियमित समयमा दुबै टिमले १-१ गोलको बराबरी खेले पछि खेल पेनाल्टी सुटआउटमा धकेलिएको थियो । पेनाल्टीमा 'ए' डिभिजन लिग च्याम्पियन चर्च ब्वाइजले ३-१ गोलअन्तरको जित हात पार्दै उपाधिनजिक पुगेको हो ।
पहिलो हाफ गोलरहित बराबरीमा सकिएको खेलको ७७औँ मिनेटमा द यङ ब्रदर्सले उपहार गोलमार्फत अग्रता लिएको थियो । चर्च ब्वाइजका खेलाडीको खुट्टामा ठोकिएको बल आत्माघाती गोलमा परिणत भएको थियो । तर दोस्रो हाफको इन्जुरी समयमा सुमन श्रेष्ठले चर्च ब्वाइजका लागि बराबरी गोल फर्काउँदै खेललाई पेनाल्टी सुटआउटसम्म पुर्याए ।
ट्राइब्रेकरमा चर्च ब्वाइजका गोलकिपर विश्वास चौधरी चम्किए । उनले इटहरीका बिशाल तामाङ र निरज फुयालको प्रहार रोके भने युगन राईको बल पोलमा ठोकिएर बाहिरियो ।
द यङ ब्रदर्सका तर्फबाट निरोज खड्का मात्र सफल भए । चर्च ब्वाइजका सुमन श्रेष्ठ, रोशन पहाडी र युवराज ढकालले गोल गरे भने नवयुव श्रेष्ठको प्रहार पोलमा लागेर बाहिरियो ।
दोस्रो सेमिफाइनलमा बिहिबार सलहेस युवा क्लब सिरहा र रेडस्टार फुटबल क्लब झापा आमने-सामने हुनेछन् । सिरहाले फिदिम स्पोर्टिङ क्लब पाँचथरलाई र झापाले सहारा क्लब पोखरालाई हराउँदै सेमिफाइनलमा प्रवेश गरेका हुन् ।
