काठमाडौं । इन्टर मायामीले अर्जेन्टनाइन हाभिय मासेरानोलाई मुख्य प्रशिक्षक नियुक्त गरेको छ ।
योसँगै मासेरानोले पूर्व टिम मेट लियोनल मेसीसँग सहकार्य गर्नेछन् । मेजर लिग सकर साइड मायामी मेसीको कप्तानीमा छ । मासेरानो र मायामीबीच सन् २०२७ सम्मका लागि सम्झौता भएको हो । बार्सिलोना, लिभरपुल, रिभर प्लेट लगायतबाट व्यावसायिक फुटबल खेलेका मासेरानोले मेसीसँग क्लब र राष्ट्रिय टिम दुबैमा पिच सेयर गरेका थिए ।
मासेरानोले यसअघि पेरिस ओलम्पिकमा अर्जेन्टिनाको अन्डर ट्वान्टी थ्री टिमको जिम्मेवारी सम्हालेका थिए । द लिटिल बोसको उपनामले परिचित मासेरोनाका लागि, क्लब फुटवलमा मायामी पहिलो अनुभव हुनेछ ।
मेसीसँगै उनले पूर्व टिम मेट लुइस स्वारेज, जोर्डी आल्बा र सर्जियो बुस्केटलाई पनि सम्हाल्नेछन् । व्यक्तिगत कारण देखाउँदै जेरार्डो मार्टिनजेले मायामी छाडेपछि मासेरानोको आगमन भएको हो ।
