काठमाडौं । साउदी प्रो लिगमा क्रिस्टियानो रोनाल्डो नेतृत्वको अल नासारले रियाद डर्बीमा अंक बाँडेको छ । गएराति भएको खेलमा नासार र अल हिलालले एक एक गोलको बराबरी खेलेका हुन् ।
रियादमा भएको खेलमा नासारले सुरुवाती अग्रता लिए पनि जोगाउन सकेन । खेल सुरु भएको ६० सेकेन्डमा नै ब्राजिलियन फरवार्ड एन्डरसन टालिस्काले गोल गरेपछि लिग लिडर हिलाल पछि परेको थियो । टालिस्काको सिजनको यो पाँचौँ गोल हो । पहिलो हाफमा अघि रहे पनि नासार अन्त्यतिर सम्हालिन सकेन् ।
७७ औं मिनेटमा हिलालले गोल गर्दै खेल बराबरी गरेको थियो । हिलाललाई सर्वियन मिडफिल्डर सेर्गी मिलिकोभिच सेभिचले हारबाट जोगाएका हुन् । हिलालले पहिलो पटक अंक गुमाएको हो ।
यसका बाबजुत पनि नासार तालिकाको शीर्ष स्थानमा रहेको हिलालभन्दा ६ अंकले पछि छ । हिलालको ९ खेलबाट २५ अंक छ । तेस्रो स्थानमा रहेको नासारको १९ र अल इत्तिहाद २४ अंकसहित दोस्रो स्थानमा छ ।
