कञ्चनपुर । कञ्चनपुरको दोधाराचाँदनी नगरपालिका-३ बडुवाल टोल नजिक नेपाल-भारत सीमा क्षेत्र दशगजामा एक वयस्क हात्ती मृत अवस्थामा फेला परेको छ ।
शुक्लाफाँटा राष्ट्रिय निकुञ्जका वरिष्ठ संरक्षण अधिकृत मनोज साहका अनुसार हात्ती सिमा स्तम्भ नम्बर ८०० को झण्डै ५ सय मिटर दक्षिण दशगजा क्षेत्रमा मृत अवस्थामा भेटिएको हो ।
सीमा क्षेत्रमा घटना भएको हुनाले नेपाल र भारत दुबै देशका सुरक्षा निकाय, निकुञ्ज तथा वन प्रशासनका अधिकारीहरू घटनास्थलमा पुगेका छन् । प्रारम्भिक अनुसन्धानका क्रममा मृत हात्तीको शरीर दशगजामा र टाउको नेपाली भूमिमा रहेको पाइएको छ ।
हालसम्म हात्तीको मृत्युको कारण स्पष्ट हुन सकेको छैन । सम्बन्धित निकायहरूले घटनाको विस्तृत अनुसन्धान गरिरहेको बताएका छन् । यसैबीच बाँके राष्ट्रिय निकुञ्जको खड्गवार हात्तीसारमा हात्तीले आक्रमण गर्दा हात्तीको सुसारे तथा माउतेको मृत्यु भएको छ ।
बर्दिया ठाकुरबाबा नगरपालिका-९ घर भई बाँके राष्ट्रिय निकुञ्जमा कार्यरत अन्दाजी ४५ वर्षका आशाराम थारुको घटनास्थलमै मृत्यु भएको बाँके राष्ट्रिय निकुञ्जका वरिष्ठ संरक्षण अधिकृत वीरेन्द्र कँडेलले बताउनुभयो । गएराति दाना हाल्ने क्रममा १८ वर्षको गणेशगज नामक हात्तीले थारुलाई आक्रमण गरेको थियो ।
