काठमाडौं । नेकपा (एमाले)का नेताहरूले पार्टी प्रक्रिया र प्रणालीमा चल्न नसकेको भन्दै आसन्न महाधिवेशनबाट नीति र नेतृत्वको रूपान्तरण गर्नुपर्नेमा जोड दिएका छन् ।
नेतृत्वले लोकतान्त्रिक विधिअनुसार पार्टी चलाउन नसक्दा एमालेप्रति जनताको विश्वास कमजोर हुँदै गएको उनीहरूको भनाइ छ । एमालेको ११औं महाधिवेशनबारे अलग्गै समूह बनाएर नयाँ नेतृत्व छान्ने अभियान चलाइरहेका नेताहरूले सोमबार काठमाडौंमा पत्रकार सम्मेलन गर्दै अध्यक्ष ओलीको एकाधिकारले पार्टी कमजोर बन्दै गएको आरोप लगाए ।
अध्यक्ष ओलीले आफूलाई सर्वेसर्वा ठानेको र पार्टीमा बहस तथा छलफललाई निषेध गरेको दाबी गर्दै नेताहरूले पार्टीहरूमा दुई कार्यकालको व्यवस्था कानुनमै गर्नुपर्नेमा जोड दिए । नेताहरूको अध्यक्ष ओलीले जनताको बहुदलीय जनवादको अपव्याख्या र अवमुल्यन गरेको तथा आफूले तोकेर नेता छान्न खोजेको आरोप पनि लगाए । एमालेमा यो समूहले ईश्वर पोखरेललाई अध्यक्षको उम्मेदवार बनाएर ११औं महाधिवेशनमा होमिँदैछ ।
