काठमाडौं । गृहमन्त्री ओमप्रकाश अर्यालले गत २३ र २४ भदौमा लुटिएका हातहतियार फिर्ता ल्याउन देशभर सुरक्षा कारबाही सञ्चालन गरिएको बताउनुभएको छ ।
बिहीवार राष्ट्रिय सभाको सार्वजनिक नीति तथा प्रत्यायोजित विधायन समितिको बैठकमा गृहमन्त्री अर्यालले आन्दोलनका क्रममा लुटिएका हतियारमध्ये हालसम्म ७ सय २३ थान हतियार बरामद गरिएको जानकारी दिनुभयो ।
उहाँले जेन–जी आन्दोलनका क्रममा कारागारबाट भागेका १४ हजार ५ सय ५४ कैदीबन्दीमध्ये ९ हजार ६ सय ९७ जनालाई फिर्ता ल्याइएको पनि बताउनु भयो । बाँकी ४ हजार ८सय ५७ फरार कैदीको खोजीका लागि विशेष अपरेशन प्रक्रिया जारी रहेको पनि उहाँले बताउनु भयो । उहाँले जेन–जी आन्दोलनको क्रममा आपराधिक घटनामा संलग्न ५ सय ९५ जनालाई पक्राउ गरिएकोमा २ सय ८३ जनाविरुद्ध मुद्दा दर्ता भइसकेको पनि बताउनु भयो । उहाँले आगामी आम निर्वाचनमा सुरक्षाका लागि सेना परिचालनसम्बन्धी प्रस्ताव राष्ट्रिय सुरक्षा परिषद्बाट पारित भइसकेको उल्लेख गर्दै निर्वाचनलक्षित प्रदेशस्तरीय सुरक्षा गोष्ठी सातै प्रदेशमा सञ्चालन हुँदै आएको पनि बताउनु भयो ।
सुरक्षा निकायहरुको सुदृढीकरणका लागि आवश्यक उपकरण र सवारी साधन किन्न स्रोत सुनिश्चित गरिएको बतउँदै उहाँले नेपाल प्रहरीका लागि २ सय ६२ सवारी, सशस्त्र प्रहरीका लागि १ सय ९९ र राष्ट्रिय अनुसन्धान विभागका लागि ६ सवारी खरिद प्रक्रिया अगाडि बढाइएको स्पष्ट पार्नुभयो ।
मन्त्री अर्यालले प्रतिनिधि सभा सदस्य निर्वाचन घोषित मितिमा सम्पन्न गर्न सरकार कटिवद्ध रहेको पनि बताउनु भयो ।
