काठमाडौं । नेपाल बार एसोसिएसनको २७ औं केन्द्रीय कार्यसमितिको निर्वाचन आज हुँदैछ । निर्वाचनमा देशभरका ९ हजार ९ सय ९७ जना कानुन व्यवसायी मतदाता छन् । बिहान ८ बजेदेखि बेलुका ४ बजेसम्म मतदानको समय तोकिएको छ ।
काठमाडौं उपत्यकाभित्र सर्वोच्च अदालत परिसर र नेपाल बार एसोसिएसन परिसर गरी दुई ठाउँमा मतदान केन्द्र राखिएको छ । त्यस्तै देशभर ३६ मतदान केन्द्र तोकिएको छ ।
मतदानमा सहभागी हुन अनिवार्य रूपमा कानुन व्यवसायी परिषद्बाट जारी गरिएको परिचयपत्र वा कानुन व्यवसायीको प्रमाणपत्र वा नागरिकताको प्रमाणपत्रमध्ये एक सक्कलै लिई उपस्थित हुन नेपाल बार एसोसियसनले आग्रह गरेको छ ।
निर्वाचनमा सत्ता पक्षीय नेकपा एमाले निकट पीपीएलए र नेपाली कांग्रेसनिकट डीएलएबीच गठबन्धन भएको छ। डीएलए र पीपीएलए गठबन्धनबाट डीएलएका वरिष्ठ अधिवक्ता विजयप्रसाद मिश्र अध्यक्षका उम्मेदवार हुनुहुन्छ भने एमाले निकट पीपीएलएका केदार कोइराला महासचिवका उम्मेदवार हुनुहुन्छ ।
यस्तै प्रतिपक्षी समूह नेकपा (माओवादी केन्द्र) निकट आरपीएलएले राष्ट्रिय स्वतन्त्र पार्टी निकट स्वतन्त्र कानुन व्यवसायी संगठन र नेकपा (एकीकृत समाजवादी) निकट कानुन व्यवसायीहरूसँग मिलेर प्यानल बनाएको छ ।
यो समूहबाट आरपीएलएका रमनकुमार श्रेष्ठ अध्यक्षका उम्मेदवार हुनुहुन्छ भने रास्वपा निकट कानुन व्यवसायी यज्ञमणि न्यौपाने महासचिवका उम्मेदवार हुनुहुन्छ। अध्यक्षमा कुल ५ जनाको उम्मेदवारी छ । महासचिवमा भने ३ जनाको मात्र उम्मेदवारी छ ।
