पोखरा । नवलपरासी बर्दघाट सुस्तापूर्व (नवलपुर) र मध्यविन्दु नगरपालिकाका ३० जना किशोरीहरूले आज गण्डकी प्रदेशका मुख्यमन्त्री सुरेन्द्रराज पाण्डेलाई भेटेर किशोरी र बालबालिकासम्बन्धी विभिन्न मुद्दामा ध्यानाकर्षण गराएका छन् ।
किशोरीहरूले आगामी वर्ष ०८२/०८३ को लागि प्रदेश सरकारको नीति तथा कार्यक्रममा किशोरकिशोरी र बालबालिकाका सवालहरूमा ध्यान दिन मुख्यमन्त्री समक्ष ध्यानाकर्षण गराएका हुन् ।
कार्यक्रममा सहभागी किशोरीहरूले गण्डकी प्रदेश सरकारसँग समन्वय गरी आफूहरूको लागि थप अवसर र सुरक्षा सुनिश्चित गर्न विभिन्न मागहरू राखेका छन्।
यस्ता छन् किशोरीहरूका मागः
निशुल्क र गुणस्तरीय शिक्षा: किशोरीहरूले विद्यालय शिक्षा पूर्ण रूपले निशुल्क र सिपमुलक शिक्षा उपलब्ध गराउनको लागि माग गरेका छन्। साथै, विद्यालयहरूमा मानसिक स्वास्थ्य, स्वास्थ्यकर्मी र मनोविज्ञहरूको व्यवस्था गर्नुपर्ने आग्रह गरेका छन्।
लैंगिक समानता र सुरक्षा: किशोरीहरूले आफ्ना जीवनको सुरक्षाका लागि गण्डकी प्रदेशमा हिंसा, दुर्व्यवहार र अन्यायका घटनाहरूको अन्त्यको लागि ठोस कदम चाल्न सरकारसँग अनुरोध गरेका छन्। बालिका र किशोरीहरूको सुरक्षाका लागि बालमैत्री वातावरणको निर्माणका लागि अनुगमन र मूल्याङ्कनको प्रक्रिया सुनिश्चित गर्नुपर्ने बताइएको छ।
कृषि र पोषणका कार्यक्रमहरू: किशोरीहरूले अर्गानिक कृषि र बाल पोषणको क्षेत्रमा पनि प्रदेश सरकारले सहयोग पुर्याएकोमा धन्यवाद दिँदै, यसको निरन्तरताको लागि थप पहल गर्न आग्रह गरेका छन्।
सुरक्षित सार्वजनिक स्थान र खेलकुदका अवसरहरू: किशोरीहरूले पार्क, खेलमैदान र सार्वजनिक स्थानहरूलाई बालमैत्री र किशोरीमैत्री बनाउनका लागि आवश्यक भौतिक संरचनाहरू निर्माण गर्न सरकारसँग आग्रह गरेका छन्। साथै, खेलकुद र साहसिक गतिविधिहरूमा बालिकाहरूको सक्रिय सहभागिता प्रोत्साहन गर्नको लागि पुरस्कार र प्रोत्साहनको व्यवस्था गर्नको लागि सरकारसँग अपिल गरिएको छ।
बालिकाहरूको लागि सामाजिक सुरक्षा: किशोरीहरूले बालिका विमा कार्यक्रम, अभिभावक विहिन बालबालिकाहरूको लागि सामाजिक सुरक्षा प्रणालीको सहज उपलब्धताका लागि पनि सरकारसँग ध्यानाकर्षण गराएका छन्।
कार्यक्रमको समापनमा, किशोरीहरूले गण्डकी प्रदेश सरकारलाई बालिका र किशोरीमैत्री नीतिहरूको कार्यान्वयनमा ध्यान दिन आग्रह गर्दै, आगामी वर्षको नीति र कार्यक्रमहरूमा बालबालिकाको सहभागिता सुनिश्चित गर्नुपर्ने बताएका छन्। यस अवसरमा गण्डकी प्रदेश सरकारका मुख्यमन्त्रीलाई धन्यवाद दिँदै किशोरीहरूले आफ्नो आवाज सरकारसम्म पुर्याएकोमा आभार प्रकट गरेका छन्।
कार्यक्रमको अन्त्यमा मुख्यमन्त्री पाण्डेले किशोरीहरूको आवाज सुन्ने र यसमा आवश्यक कदम चाल्ने प्रतिबद्धता व्यक्त गर्दै, प्रदेशका सबै स्थानीय तहहरूमा बालबालिका र किशोरीका लागि सुविधाजनक र सुरक्षित वातावरण निर्माणका लागि काम गर्ने आश्वासन दिनुभयो ।
