काठमाडौं । काठमाडौँको कमलपोखरीस्थित शानदार म:म पसलमा ग्यास सिलिन्डर विस्फोट हुँदा घाइते भएका ११ जनामध्ये २ जनाको उपचारको क्रममा मृत्यु भएको छ ।
कीर्तिपुर अस्पतालमा उपचाररत मकवानपुरका १८ वर्षीय रविन राई र उदयपुरका २५ वर्षीय भीमबहादुर घले मगरको मृत्यु भएको हो ।
९ जनाको कीर्तिपुर अस्पतालमा उपचार जारी छ । ग्यास पड्किएपछि जलेर घाइते भएका उनीहरुलाई कीर्तिपुर अस्पताल लगिएको थियो । शय्या अभावका कारण आइसीयूमा राख्नुपर्ने बिरामीलाई जनरल वार्डमा राखेर उपचार गरिएको थियो ।
सरकारले सातै प्रदेशका विभिन्न अस्पताललाई जलन उपचार केन्द्र तोकेर आर्थिक अभाव भएका बिरामीलाई निःशुल्क उपचार गर्ने घोषणा गरे पनि पूर्वाधार र जनशक्तिको अभाव छ ।
