काठमाडौं । गौतमबुद्ध अन्तर्राष्ट्रिय विमानस्थल भैरहवामा माघ १० गतेदेखि भूउपग्रहमा आधारित ‘आरएनपी-एआर’ प्रणाली लागू हुने भएको छ । यसले नौं सय मिटर भिजिबिलिटीमै विमान अवतरण गर्न सक्ने छन्।
हिउँदका तीन महिना मंसिर, पुस र माघमा हुस्सुले भिजिबिलिटी घट्ने समस्याले अन्तर्राष्ट्रिय उडान स्थगन हुने गरेको छ । समस्या समाधानका लागि ‘आरएनपी-एआर’ प्रणाली लागू गर्न लागिएको हो ।
नागरिक उड्डयन प्राधिकरणको प्राविधिक तहदेखि प्रधानमन्त्री तहबाट अनुरोध गर्दा पनि ‘इन्स्ट्रुमेन्ट ल्यान्डिङ सिस्टम’ आईएलएस सञ्चालनमा भारतले सहमति नदिएपछि जहाज अवतरणका क्रममा मार्गनिर्देश गर्ने स्याटलाइटमा आधारित ‘आरएनपी-एआर’ प्रणाली लागू गर्ने निर्णय गरेको हो ।
रेडियो नेभिगेसन प्रणाली आईएलएस भन्दा जहाज अवतरणमा भूउपग्रहमा आधारित ‘आरएनपी-एआर’ प्रणाली उत्तम मानिन्छ । भैरहवा विमानस्थलमा जडान हुन लागेको यो प्रणाली नेपाली प्राविधिकहरूले नै डिजाइन गरेका हुन् ।
