मकवानपुरमा विदेशी मुद्रासहित ३ जना भारतीय नागरिक पक्राउ

मकवानपुर । जिल्ला प्रहरी कार्यालय मकवानपुरले स्रोत नखुलेको ४६ हजार विदेशी मुद्रासहित ३ जना भारतीय नागरिक पक्राउ गरेको छ । भारत गोरखपुरका प्रशान्त पाठकको साथबाट १४ हजार युरो, भारत उत्तर प्रदेशका विजयसिंह कुशबाहको साथबाट १२ हजार यूएस डलर, भारत राजस्थनका राहुल कुमार माण्डवातको साथबाट २० हजार यूएस डलर बरामद गरिएको हो ।

प्रहरीले हेटौंडा-१ चौकीटोलबाट उनीहरुलाई पक्राउ गरेको हो । काठमाडौंबाट हेटौडातर्फ आउँदै गरेको बा.प्र.०३-००१ ज ०७६५ नं. को यात्रुबाहक माइक्रोबसमा  आएका भारतीय नगरिकहरुका साथबाट विदेशी मुद्रा बरामद भएको हो ।

विदेशी मुद्रासहित पक्राउ परेका भारतीय नागरिकलाई आवश्यक कारबाहीको लागि राजश्व अनुसन्धान कार्यालय मीनभवन ललितपुर पठाइएको प्रहरी उपरिक्षक खड्काले बताउनुभयो । बरामद भएको विदेशी मुद्रा ६२ लाख ९० हजार नेपाली रुपैयाँ हुन आउने बताइएको छ ।