काठमाडौं । नेपाल सरकारका सबै वेबसाइट डाउन भएका छन् । सर्भरमा समस्या आएका कारण सरकारका सबै निकाय तथा कार्यालयहरुको वेबसाइट डाउन भएका हुन् ।
यसबाट सबैभन्दा बढी विमानमार्फत विदेश जान लागेका यात्रु प्रभावित भएका छन् ।
त्रिभुवन अन्तर्राष्ट्रिय विमानस्थलस्थित अध्यागमन कार्यालयको सर्भर डाउन हुँदा विभिन्न पाँचवटा वायुसेवाका सयौँ यात्रु अलपत्र परेका छन् ।
सर्भरले काम नगर्दा आवागमन र प्रस्थानतर्फ भिसा र पासपोर्टको डिजिटल अध्ययन हुन नसकेको विमानस्थल कार्यालयले जनाएको छ ।
सर्भर बिग्रिएपछि फ्लाई दुबई, एयर इन्डिया, थाई स्माइल र नेपाल एयरलाइन्सको उडान रोकिएको छ । उडान प्रभावित हुँदा तेस्रो मुलुक जानुपर्ने दर्जनौँ यात्रुका कनेक्टिङ उडान छुट्ने भएका छन् । सेवा प्रभावित भएपछि अलपत्र परेका यात्रुहरुले विमानस्थल भित्रै नाराबाजी गरिरहेका छन् ।