सामान्य परिवारका खेती किसानी तथा मजदुरी गरी जीविकोपार्जन गर्ने सप्तरीको टेंगरी गाउँमा भएको आगलागीमा परी सर्वस्व गुमाएका ११ घरका ६४ जना विचल्लीमा परेका छन् । कुनै पनि निकायले अहिलेसम्म ओत लाग्ने छानोको व्यवस्था नगर्दा तीन दिनदेखि अग्निपिडितहरु खुला आकाशमुनि बस्न बाध्य छन् ।
सप्तरीको अग्निसाइर कृष्णासवरन गाउँपालिका वडा नम्बर ४ टेंगरीका डम्बर यादव आउँदो बैशाखमा छोरीको बिहे गर्ने तयारीमा थिए । तर शनिवार राति भएको आगलागीमा जोहो गरेर राखेको नगद २ लाख ५० हजार रुपैयाँ, सुनचाँदी, लताकपडासँगै छोरीको बिहे गर्ने यादव परिवारको सपना पनि आगलागीले चकनाचुर भयो । आगोको भुसमा अहिले उनी भेटिन्छ कि भनेर सुनचाँदी खोजिरहन्छ ।
घर र घरमा रहेका खाधान्न सबै आगलागीमा डढ्यो । छोरीको बिहे गर्न राखेको २ लाख ५० हजार रुपैयाँ, सुन चाँदी सबै खरानी भयो । गाउँको खेती हुने जग्गा बिक्री गरेर अर्को ठाउँमा नयाँ जग्गा खरिद गर्न जोहो गरेर राखेको नगद ४ लाख रुपैयाँ स्थानीय भोला यादवको पनि सोही आगलागीमा डढेर खरानी भयो । टेंगरीको आगलागीमा परी डम्बर र भोला जस्तै अन्य ९ परिवारको हालत पनि यस्तै छ । घरमा आगो लागेर ५ वटा घर, सुन, धान चामल गहुँ डढ्यो । जग्गा बिक्री गरेर राखेको ४ लाख रुपैयाँ पनि डढ्यो ।
शनिबार मध्यरातमा भएको आगलागीमा दुई करोडको धनमाल क्षति भएको र आगलागी कुन कारणले भएको अहिलेसम्म यकिन हुन सकेको छैन । आगलागीबाट गाउँका ३४ वटा घरगोठ जलेर खरानी भएका छन् । स्थानीय सरकारले ११ अग्नीपीडित परिवारलाई २५ केजी चामल, मुराही, च्यूरा बाँडेको छ । बस्ने बास र खाने अन्न नै आफूहरुको पहिलो आवश्यकता भएको पीडितहरुको भनाइ छ । सरकारसँग उनीहरुले तत्काल पुनर्स्थानाको माग गरेका छन् ।
