काठमाडौं । जेन-जी आन्दोलनका बेला प्रधानमन्त्री रहनुभएका केपी शर्मा ओली र गृहमन्त्री रमेश लेखकमाथि प्रहरीले ज्यानसम्बन्धी कसुरमा अनुसन्धान सुरू गरेको छ ।
शनिबार बिहान भक्तपुरको गुण्डुस्थित निवासबाट ओली र भक्तपुरको कटुञ्जेस्थित एक घरबाट लेखकलाई प्रहरी पक्राउ गरी अनुसन्धान थालेको हो । गौरीबहादुर कार्की नेतृत्वको जाँचबुझ आयोगले ओली र लेखकलाई लापरबाहीपूर्ण र हेलचेर्क्याइँपूर्ण क्रियाकलाप र व्यवहार गरेका कारण मानवीय क्षति भएको भन्दै फौजदारी कसुरमा अनुसन्धान गर्न सिफारिस गरेको थियो ।
शुक्रबार बसेको मन्त्रिपरिषद् बैठकले त्यो सिफारिस कार्यान्वयन गर्ने निर्णय गरेको थियो र बेलुकीबाटै कार्यान्वयन गर्न गृहमन्त्री सुधन गुरूङले नेपाल प्रहरी प्रमुख दानबहादुर कार्की र सशस्त्र प्रहरी प्रमुख राजु अर्यालसँग कुराकानी गर्नुभएको थियो । पक्राउ गर्नुअघि कानुनी प्रक्रिया पूरा गर्नुपर्ने प्रहरी प्रमुख कार्की र सशस्त्र प्रहरी प्रमुख अर्यालले सुझाव दिएका थिए ।
त्यसपछि गृह मन्त्रालयले नै ओली र लेखकविरूद्ध जाहेरी दिएको थियो । जाहेरीअनुसार ज्यानसम्बन्धी कसुरमा अनुसन्धान गर्न तत्काल पक्राउ गर्नुपर्ने भन्दै प्रहरीले जरूरी पूर्जी तयार गरेको थियो । त्यसपछि तत्कालीन प्रधानमन्त्री ओली र तत्कालीन गृहमन्त्री लेखक बिहानै पक्राउ पर्नुभएको हो ।
सुरक्षा अधिकृतहरूका अनुसार, ज्यानसम्बन्धी कसुरको अनुसन्धानमा पूर्वप्रधानमन्त्री तहका व्यक्तिलाई पक्राउ गरिएको यो पहिलो घटना हो । जाँचबुझ आयोगको प्रतिवेदनमा २३ भदौमा गोली प्रहारबाट केहीको मृत्यु भइस्केपछि पनि गोली रोक्नतिर तत्कालीन प्रधानमन्त्री ओली लगायत कुनै पनि पदाधिकारी अग्रसर नभइ लापरबाहीपूर्ण र हेलचेर्क्याइँपूर्ण क्रियाकलाप र व्यवहार गरेको भनिएको छ ।
कर्फ्यु लाग्नुभन्दा अघिबाट चार घन्टासम्म गोली चल्दासमेत तत्कालीन पदाधकिारीले नरोकेको भनिएको छ । गोली चलाउने काम रोक्नेतिर प्रयास नगरी ओली र लेखकको लापरबाहीपूर्ण कार्यका कारण किशोरकिशोरीको ज्यान गएको देखिएको प्रतिवेदनमा उल्लेख छ ।
पक्राउ पर्नु भएका पूर्वप्रधानमन्त्री ओली र पूर्व गृहमन्त्री लेखकलाई म्याद थपका लागि आइतबार अदालतमा पेस गरिने प्रहरीले जनाएको छ।
