काठमाडौं । किसानका प्रतिनिधिहरुले सरकारले निर्धारण गरेको उखुको न्यूनतम् समर्थन मूल्य पर्याप्त नभएको बताएका छन् ।
किसानका प्रतिनिधिहरुले प्रतिक्विन्टल ७ सय ५ रुपैयाँ माग गरेको भए पनि सरकारले अनुदानसहित ६ सय १० रुपैयाँ निर्धारण गरेको छ । यसमा सरकारी अनुदान ७० रुपैयाँ जोडिएको छ । बजार मूल्यअनुसार यो पर्याप्त नभए पनि खेतको उखु छिटो बिक्रीको व्यवस्था मिलाउनसमेत उनीहरुको माग छ ।
‘सरकारले गरेको निर्णयमा हामी खुसी नै छौं, तर बजारमा बढेको मूल्यका आधारमा अझ रेट बढाको भए हामी झन् खुसी हुने थियौं,’ उखु किसान वीरेन्द्र यादव बताउँछन् ।
यता कृषि तथा पशुपन्छी विकास मन्त्रालयले भने किसान, उद्योगी र सरकारका प्रतिनिधिको संयुक्त बैठकले तय गरेअनुसार नै मूल्य निर्धारण भएको बताएको छ । गत वर्षभन्दा प्रतिक्विन्टल २० रुपैयाँ बढी रहेकाले किसानलाई राहत हुने कृषि तथा पशुपन्छी विकास मन्त्रालयका प्रवक्ता प्रकाशकुमार सन्जेल बताउँछन् ।
नेपालमा वार्षिक करिब ३१ लाख टन उखु उत्पादन हुन्छ। उद्योग मन्त्रालयका अनुसार अहिले देशमा १२ वटा चिनी उद्योग सञ्चालनमा छन् । वार्षिक साढे दुई लाख टन चिनीको माग रहे पनि एक लाख ५० हजार टन मात्र उत्पादन हुने गरेको छ ।
