काठमाडौं । सुदूरपश्चिम सरकारलाई समर्थन गर्ने कि नगर्ने भन्ने विषयलाई लिएर नागरिक उन्मुक्ति पार्टी (नाउपा) भित्र किचलो देखिएको छ ।
प्रदेश सरकार गठनमा निर्णायक रहेको नागरिक उन्मुक्ति पार्टीले सुदूरपश्चिम सरकारलाई दिएको समर्थन फिर्ता लिने अध्यक्ष रञ्जिता श्रेष्ठको निर्णय छ भने संरक्षक रेशमलाल चौधरीले भने फिर्ता नलिने अडानसँगै पार्टीभित्र किचलो देखिएको हो ।
नाउपा अध्यक्ष श्रेष्ठको अध्यक्षतामा अस्ति बुधबार टीकापुरमा बसेको बैठकले सुदूरपश्चिम प्रदेशका मुख्यमन्त्री कमलबहादुर शाहलाई दिएको समर्थन फिर्ता लिने निर्णय भएको छ । तर प्रदेश सांसदहरु संरक्षक चौधरीको इसारामा सरकारमा सहभागी हुँदै समर्थन जनाइरहेका छन् ।
यसैबीच आज (शुक्रबार) अध्यक्ष श्रेष्ठले सुदूरपश्चिममा कमलबहादुर शाह नेतृत्वको सरकारलाई दिएको समर्थन फिर्ता लिन प्रदेश संसदीय दललाई निर्देशन दिएकी छन् ।
उनले सुदूरपश्चिम प्रदेश सभा संसदीय दलका नेता घनश्याम चौधरीलाई पत्र पठाउँदै नेपाली कांग्रेस नेतृत्वको सरकारलाई दिएको समर्थन फिर्ता लिन निर्देशन दिएकी हुन् । अध्यक्ष रञ्जिताले प्रदेश संसदीय दलका नेता चौधरीलाई निर्देशन दिँदै पत्रमा भनेकी छन्, ‘नागरिक उन्मुक्ति पार्टीको केन्द्रीय कमिटी बैठकले २०८०/१२/१४ गते पार्टी कार्यालय टीकापुर कैलालीमा बसेको बैठकको निर्णयअनुसार पार्टीले दिएको समर्थन फिर्ता लिने निर्णय भएकाले सोहीबमोजिम सरकारबाट बाहिर आउन निर्देशन गर्दछु । अन्यथा पार्टीको विधान आकर्षित गरिनेछ ।’
उसो त टीकापुरमा बसेको बैठकको निर्णय नाउपाका केन्द्रीय संस्थापक सदस्यद्वय लक्ष्यबहादुर चौधरी र लक्ष्मणकिशोर चौधरीले आफूहरुलाई मान्य नहुने भन्दै आज (शुक्रबार) विज्ञप्तिसमेत जारी गरेका छन् । चौधरीद्वयद्वारा जारी विज्ञप्तिमा भनिएको छ, ‘नागरिक उन्मुक्ति पार्टीको मिति २०८०/१२/१४ गते टीकापुरमा संस्थापक केन्द्रीय सदस्यहरुको बैठकमा भएको निर्णयप्रति हाम्रो समर्थन नरहेको घोषणा गर्दछौं ।’
नाउपाको टीकापुरमा बसेको बैठकले सबै तहका सरकारमा नयाँ गठबन्धनलाई समर्थन गर्ने निर्णय गरेको छ । बैठकमा संस्थापक केन्द्रीय सदस्य र सांसदहरु सहभागी थिए ।
सुदूरपश्चिम प्रदेश सरकारमा अहिले नाउपाबाट ४ मन्त्री र एक राज्यमन्त्री छन् । उनीहरु संरक्षक रेशमको निर्णयमा मन्त्री बनेका हुन् । एकजना प्रदेशसभा सदस्य कैलाश चौधरी रञ्जिताको निर्णयको पक्षमा छन् । ५३ सदस्यीय सुदूरपश्चिम प्रदेशसभामा सरकार बनाउन २७ सांसदको समर्थन जुटाउनुपर्नेछ ।
यो पनि...
नागरिक उन्मुक्ति पार्टीमा भाँडभैलो
नागरिक उन्मुक्ति पार्टीमा श्रीमान्-श्रीमतीको शक्ति संघर्ष, पार्टीले उठाएका मुद्दा नै विसर्जनतर्फ
