काठमाडौं उपत्यका केन्द्रित रास्वपाकाे अभिवादन कार्यक्रम जारी

काठमाडौं । राष्ट्रिय स्वतन्त्र पार्टी-रास्वपाले शनिबार काठमाडौंउपत्यका केन्द्रित जनसम्पर्क तथा घण्टी अभिवादन कार्यक्रम जारी राखेको छ । 

कार्यक्रमले उपत्यकाका तीनै जिल्ला समेट्ने छ । ‘एउटै लक्ष्य, एउटै आवाज, एउटै प्रतिबद्धता’ भन्ने मूल नाराका साथ आयोजना भएको कार्यक्रमको उद्देश्य जनतासँग प्रत्यक्ष भेटघाट र जनसम्पर्क विस्तार गर्नु रहेको रास्वपाले जनाएको छ। 

पशुपतिनाथ प्रवेशद्वार नजिकैको गौशालाबाट सुरू भएको यो अभियान बेलुकी साढे ६ बजे वनस्थलीस्थित पार्टीको केन्द्रीय कार्यालयमा पुगेर समापन हुनेछ। पशुपतिनाथबाट सुरू भएको यात्राले चाबहिल, जोरपाटी, साँखु, मुलपानी, पेप्सीकोला हुँदै भक्तपुरको सानोथिमी, दुवाकोट, ब्यासी, कमलविनायक, जगाती र सूर्यविनायक पूरा गरिसकेको छ । 

 जडिबुटी, ग्वार्को, मंगलबजार, जावलाखेल हुँदै ललितपुरको पुलचोकमा पुगेपछि सहभागीहरुले दिउँसो १:०० बजे खानाका लागि छोटो समय छुट्याइएका थिए । दोस्रो चरणमा कालिमाटी , टेकु, थापाथली, कीर्तिपुर, बल्खु, सतुंगल, चन्द्रागिरी, सितापाइला, स्वयम्भू, बालाजु, माछापोखरी, टोखा, बुढानीलकण्ठ, सुकेधारा, विशालनगर, बालुवाटार, नक्साल, माइतीदेवी, पुरानो बानेश्वर, नयाँ बानेश्वर, माइतीघर, पुतलीसडक, जमल, लैनचौर, सामाखुसी, गोङ्गबु हुँदै वनस्थली चोकस्थित ‘घण्टी घर’ (रास्वपा केन्द्रीय कार्यालय) मा पुगेर कार्यक्रम समापन हुनेछ।