काठमाडौं । अमेरिकी मेजर लिग सकर टोली इन्टर मायामीले अर्जेन्टिना एवं बार्सिलोनाका पूर्व डिफेन्डर जाभियर मास्चेरानोलाई नयाँ मुख्य प्रशिक्षक नियुक्त गर्ने तयारी गरेको छ । मायामीका पूर्व प्रशिक्षक जेरार्डो टाटा मार्टिनोले शुक्रबार पदबाट राजीनामा दिएपछि क्लबले मास्चेरानोलाई नयाँ मुख्य प्रशिक्षक नियुक्त गर्ने तयारी गरेको हो ।
मिडिया रिपोर्टहरूका अनुसार लियोनल मेस्सीका पूर्वसहकर्मी समेत रहेका मास्चेरानोलाई मायामीले केही दिनभित्र नयाँ प्रशिक्षकको जिम्मेवारी दिने बताइएको छ । मास्चेरानोले अर्जेन्टिनाको अन्डर ट्वेन्टी थ्री अन्तर्राष्ट्रिय टोलीलाई समेत प्रशिक्षण दिएका छन् । उनकै प्रशिक्षणमा अर्जेन्टिनाको अन्डर ट्वेन्टी थ्री टोली पेरिस ओलम्पिक २०२४ को क्वार्टरफाइनलसम्म पुगेको थियो ।
यससँगै दुई पटकका च्याम्पियन्स लिग र ६ पटकका ला लिगा विजेता ४० वर्षीय मास्चेरानोले प्रशिक्षकको रूपमा बार्सिलोनाका पूर्वसहकर्मी मेस्सी र लुइस सुआरेजसँग सहकार्य गर्ने छन् । यो महिनाको शुरूमा मायामी एमएलएस प्लेअफको पहिलो चरणबाट बाहिरिएपछि जेरार्डो टाटा मार्टिनोले व्यक्तिगत कारण देखाउँदै राजीनामा दिएका थिए ।
