महोत्तरी । महोत्तरीको मटिहानी नगरपालिका वडा नम्बर ६ मुस्लिम टोलमा आगलागी हुँदा बस्ती जलेर नष्ट भएको छ ।
आइतबार दिउँसो भएको आगलागीमा स्थानीय गफार शेख, सतार सेख, सदरे सेख, अतिम नदाफ, अन्सारुल इझारुल, इझारुल मोमिन, राजकिसोर मुखिया र रजिन्द्र मुखियाको घर जलेर खरानी भएका छन् ।
खाना पकाएर राम्ररी आगो ननिभाएकोले आगलागी भएको जिल्ला प्रहरी कार्यालय महोत्तरीले जनाएको छ । मटिहानी नगरपालिमा वारुणयन्त्र नभएले आगो समयमै नियन्त्रण गर्न नसक्दा विकराल रुप लिएको थियो । आगोलाई नियन्त्रणमा ल्याउनको लागि जलेश्वर नगरपालिका र रामगोपालपुर नगरपालिकाको दमकल प्रयोग गरिएको हो ।
नेपाली सेना, नेपाल प्रहरी, सशस्त्र प्रहरी बल र स्थानीयले आगलागी नियन्त्रणमा लिएका हुन् ।
प्रहरीको प्रारम्भिक अनुमानअनुसार आगलागीबाट २० लाख बराबरको क्षति भएको छ । आगोले घरलगायत भाँडा वर्तन, अन्नपातसमेत खरानी बनेकाले आठवटै परिवार बिचल्लीमा छन् ।
महोत्तरीमा पछिल्ला १५ दिनभित्र आगलागीका ३ घटना घटेका छन् ।
