काठमाडौं । पाकिस्तानको बलुचिस्तानस्थित क्वेटा सहरको रेलवे स्टेसनमा बम बिस्फोट हुँदा २५ जनाको मृत्यु भएको छ ।
बिस्फोटमा परी ४६ जनाभन्दा बढी घाइते भएको र मृत्यु हुनेको संख्या बढ्न सक्ने त्यहाँका अधिकारीलाई उद्धृत गर्दै बीबीसीले जनाएको छ । बलुचिस्तानका स्वास्थ्य अधिकारी वसिम बेगले बिस्फोटमा मृत्यु भएकाहरुको शवलाई अस्पताल लगिएको जानकारी दिनुभएको छ ।
क्वेटाका एसएसपी मुहम्मद बलोचले रेलवे स्टेसनमा यात्रुहरुले रेल कुरिरहेका बेला बिष्फोट भएको बताउनुभएको छ । उक्त समयमा स्टेसनमा करिब दुई सयभन्दा बढी यात्रु थिए ।
ज्यान गुमाउनेमा सैनिक पनि रहेको बताइएको छ । बिष्फोटको जिम्मा भने बलुच लिबरेसन आर्मीले लिएको छ । बलुचिस्तानका मुख्यमन्त्री सरफराज बुगातीले घटनाको निन्दा गर्दै बिस्फोटका दोषीलाई कारबाहीको दायरामा ल्याउने बताउनुभएको छ ।
