काठमाडौं । प्रधानमन्त्री केपी शर्मा ओलीले आज प्रतिनिधि सभामा सम्बोधन गर्दै हुनुहुन्छ । आज दिउँसो १ बजेदेखि बस्ने प्रतिनिधि सभा बैठकलाई प्रधानमन्त्री ओलीले सम्बोधन गर्ने कार्यसूची तय भएको संसद सचिवालयले जनाएको हो ।
प्रधानमन्त्री ओली शनिबार चीन भ्रमणमा जाँदै हुनुहुन्छ । विदेश भ्रमणअघि र भ्रमणबाट फर्किएपछि कार्यकारी प्रमुखले संसदलाई जानकारी गराउने संसदीय अभ्यास छ। प्रधानमन्त्री ओलीले शनिबारदेखि हुन लागेको चीन भ्रमणबारे सदनलाई जानकारी गराउन लागेको प्रधानमन्त्रीको सचिवालयले जनाएको छ ।
यसैबीच आजको प्रतिनिधिसभाको बैठकबाट भूमी सम्बन्धी विधेयक पारित गर्ने सरकारको तयारी छ । संघीय संसद् सचिवालयले सम्भावित कार्यसूचीमा भूमि व्यवस्था, सहकारी तथा गरिबी निवारण मन्त्री बलराम अधिकारीले भूमि सम्बन्धी केही नेपाल ऐनलाई संशोधन गर्ने विधेयक, २०८२ लाई पारित गरियोस् भन्ने प्रस्ताव प्रस्तुत गर्ने उल्लेख छ ।
कार्यसूची अनुसार प्रतिनिधि सभाका सचिव हर्कराज राईले ‘नेपाल नागरिकता (दोस्रो संशोधन) विधेयक, २०८१’ का सम्बन्धमा राष्ट्रिय सभाबाट प्राप्त सन्देश सहितको विधेयक टेबुल गर्नुहुनेछ । यस्तै सभामुख देवराज घिमिरेले संयुक्त समिति अन्तर्गतको संसदीय सुनुवाइ समितिमा सदस्यको नाम हेरफेर गर्ने कार्यसूची रहेको छ ।
