धनगढी । नेकपा एमालेले सुदूरपश्चिम प्रदेश सरकारका मुख्यमन्त्री दीर्घबहादुर सोडारीलाई दिएको समर्थन आज फिर्ता लिएको छ ।
सोडारी नेतृत्वको सरकारमा सहभागी एमालेका तीन मन्त्रीले पनि आजै राजीनामा दिएका छन् । आर्थिक मामिलामन्त्री सुरेन्द्रबहादुर पाल, वन वातावरण तथा सहकारीमन्त्री वीरबहादुर थापा र आन्तरिक मामिलामन्त्री हीरा सार्कीले राजीनामा दिनुभएको हो ।
मुख्यमन्त्री सोडारी काठमाडौं भएका कारण मुख्यमन्त्री तथा मन्त्री परिषद्को कार्यालय र मुख्यमन्त्रीको सचिवालयमा राजीनामा पत्र र समर्थन फिर्ता लिएको पत्र बुझाइएको छ ।
यसैबीच एमालेले सरकार अब अल्पमतमा परिसकेकोले राजीनामा दिएर मार्ग प्रशस्त गर्न मुख्यमन्त्रीलाई आग्रह गरेको छ । नयाँ सरकार गठनका लागि छलफल अघि बढिसकेको र छिटै सरकार गठन हुने एमाले संसदीय दलका नेता राजेन्द्रसिंह रावलले जनाउनुभयो ।
लुम्बिनीमा एमालेका मन्त्रीको राजीनामा, सरकारलाई दिएको समर्थन पनि फिर्ता
सोडारी नेतृत्वको सरकारले ल्याएको बजेट पनि पास नगर्दै एमालेले राजीनामा दिएपछि बजेट अलपत्र परेको छ । आर्थिक मामिलामन्त्री सुरेन्द्रबहादुर पालले राजीनामा दिँदै सरकार अल्पमतमा परिसकेकोले बजेट पारित हुन नसक्ने भन्दै अब अध्यादेशमार्फत नयाँ बजेट ल्याइने बताउनुभयो । यसअघि रातो किताब नआउँदै बजेटको ई-कपी सार्वजनिक भएको विषयमा छानबिन समिति गठन हुने उहाँको भनाइ छ ।
एमाले, नेकपा माओवादी केन्द्र, नागरिक उन्मुक्ति पार्टी रञ्जिता श्रेष्ठ समूह र एकजना स्वतन्त्र प्रदेशसभा सदस्यको समर्थनमा वैशाख ६ गते समाजवादी संसदीय दलका नेता सोडारी मुख्यमन्त्री नियुक्त हुनुभएको थियो ।
५३ सदस्यीय सुदूरपश्चिम प्रदेश सभामा सरकार बनाउन २७ जनाको समर्थन चाहिन्छ । नयाँ बनेको गठबन्धनमा कांग्रेसका १८ र एमालेका ११ गरी २९ जना भएकाले सहजै सरकार बन्नेछ । सुदूरपश्चिममा कांग्रेस नेतृत्वमा सरकार बन्ने गरी छलफल भइरहेको नेताहरुको भनाइ छ ।
