धनगढी । सुदूरपश्चिम प्रदेशका नवनियुक्त मुख्यमन्त्री दीर्घ सोडारीले पद तथा गोपनियताको शपथ लिनु भएको छ । प्रदेश प्रमुखको कार्यालयमा आयोजित कार्यक्रममा प्रदेश प्रमुख नजिर मियाले मुख्यमन्त्री सोडारीलाई पद तथा गोपनियताको सपथ गराउनु भएको हो ।
एकीकृत समाजवादीको प्रदेश संसदीय दलका नेता सोडारीले सत्ता गठबन्धनका तर्फबाट प्रदेश प्रमुखसमक्ष मुख्यमन्त्रीमा दाबी पेस गर्नुभएको थियो । समाजवादीका ४, एमालेका १०, माओवादी केन्द्रका १०, नागरिक उन्मुक्तिका २ र एक स्वतन्त्र गरी २७ प्रदेशसभा सदस्यको समर्थन जुटाएर उहाँले मुख्यमन्त्रीमा दाबी पेस गर्नुभएको हो ।
प्रदेश प्रमुख मियाँले संविधानको धारा १ सय ६८ को उपधारा २ बमोजिम सोडारीलाई आजै मुख्यमन्त्री नियुक्त गर्नुभएको हो । मुख्यमन्त्रीलाई समर्थन दिएपनि नेकपा एमाले तत्काल मन्त्रीपरिषदमा भने सहभागि नहुने भएको छ ।
यसैबीच नेपाली कांग्रेस र नागरिक उन्मुक्ति पार्टीका पाँच प्रदेशसभा सदस्यले भने मुख्यमन्त्री नियुक्ति असंवैधानिक भन्दै आपत्ति जनाएका छन् ।
यसअघि गत आइतबार नेपाली कांग्रेस र एकीकृत समाजवादीको समर्थनमा नागरिक उन्मुक्ति पार्टीका लक्ष्मणकिशोर चौधरी र एमाले-माओवादीको समर्थनमा नाउपाकै कैलाश चौधरीले मुख्यमन्त्रीमा दाबी पेश गर्नुभएको थियो । प्रदेश प्रमुख मियाले दुवै दाबीका आधारमा निष्कर्षमा पुग्न नसकिएको भन्दै पुन: मुख्यमन्त्रीमा दाबी आह्वान गर्नुभएको थियो ।