दाङ । नेपाली कांग्रेसका सभापति शेरबहादुर देउवाले कांग्रेसका तत्कालीन अवस्थामा पूर्वमहामन्त्री दिवंगत खुमबहादुर खड्कालाई झुटो मुद्दा लगाएर फसाउन खोजिएको दाबी गरेका छन् ।
दाङको लमही नगरपालिका ९, अमिलियामा (शुक्रबार) कांग्रेसका पूर्वमहामन्त्री दिवंगत खड्काको शालिक अनावरण गर्दै देउवाले देशका लागि काम गर्न खोज्दा खड्कामाथि झुटो मुद्दा लगाएर फसाउन खोजिएको बताए ।
उनले दिवंगत नेता खड्का विकासप्रेमी, मिलनसार र जनताले रुचाएका नेता भएको स्मरण गरे । देउवाले खड्काले छाडेर गएका बाँकी काम पूरा गर्ने दायित्व आफूहरु सबैको भएको पनि बताएका छन् ।
खड्काको भारतको दिल्लीस्थित अपोलो अस्पतालमा उपचारको क्रममा २०७४ चैत १६ गते निधन भएको थियो । सालिक अनावरण कार्यक्रममा कांग्रेस नेताहरुले पार्टी र जनतालाई जोड्न खड्काको योगदान अतुलनीय रहेको, अहिले उनको अभाव पार्टीले भोग्नुपरेको टिप्पणी गरे ।
