काठमाडौं । काठमाडौं महानगरपालिकाका प्रमुख प्रशासकीय अधिृकत सरोज गुरागाईंले आज कार्यालय पुगेर हाजिर गर्नुभएको छ ।
उपप्रमुख सुनिता डंगोल, महानगरका कर्मचारी तथा जनप्रतिनिधिहरुको सहयोगमा उहाँले हाजिर गर्नुभएको हो । तर, प्रमुख प्रशासकीय अधिकृत गुरागाईं कार्यालय प्रवेश गर्न खोज्दा नगर प्रहरी र कर्मचारीबीच तनाव उत्पन्न भएको थियो भने कर्मचारीहरुले नाराबाजीसमेत गरेका थिए ।
कर्मचारी र जनप्रतिनिधिको घेराका बीच गुरागाईं कार्यकक्षमा पुग्नु भएको थियो । महानगर प्रमुख बालेन्द्र शाह (बालेन) को निर्देशनमा प्रमुख प्रशासकीय अधिकृतको कोठामा तालासमेत लगाइएकोमा कर्मचारीहरुले ताला फोडेर गुरागाईंलाई हाजिर गराएका हुन् ।
प्रमुख बालेनले गुरागाईंलाई गत पुस ७ गतेदेखि बिदामा राख्नुभएको थियो । साढे तीन महिनादेखि प्रमुख प्रशासकीय अधिकृतविहीन हुँदा महानगरका कर्मचारीहरुले तलब समेत पाएका छैनन् ।
