काठमाडौं । मन्त्रिपरिषद बैठक आज अपराह्न चार बजे बस्दै छ । सिंहदरबारस्थित प्रधानमन्त्री तथा मन्त्रिपरिषदको कार्यालयमा बैठक बस्ने छ ।
बैठकमा सुरक्षा अधिकारीहरुको बढुवालगायतका विषयमा छलफल हुने स्रोतले बताएको छ ।
डेढ महिना नपुग्दै राष्ट्रिय स्वतन्त्र पार्टी (रास्वपा) सरकारबाट बाहिरिएपछि पहिलोपटक मन्त्रिपरिषद बैठक बस्न लागेको हो ।
आइतबार राति रास्वपाबाट मन्त्री बनेका तीन जनाले प्रधानमन्त्री पुष्पकमल दाहाललाई राजीनामा बुझाएका थिए ।
नागरिकता विवादका कारण पार्टी सभापति रवि लामिछानेको सांसद पद खारेजसँगै उपप्रधान तथा गृहमन्त्री पदसमेत गुमेपछि सरकारमा पुनः फर्किने लामिछानेको प्रयास विफल हुँदा सरकारबाटै बाहिरिने निर्णय गरेको हो ।
आइतबार दिउँसो बसेको पार्टीको केन्द्रीय समिति र संसदीय दलको बैठकले सरकारलाई दिएको समर्थन यथावत राख्दै सरकारबाट बाहिरिने निर्णय गरेको थियो ।
