काठमाडौं । टर्कीमा गएको शक्तिशाली भूकम्पमा परी १७ जनाको मृत्यु भएको छ ।
स्थानीय समयअनुसार सोमबार बिहान ४ : १७ बजे ७ दशमलब ८ म्याग्निच्युडको भूकम्प गएको अमेरिकाको जियोलोजिकल सर्भेले जनाएको छ ।
टर्कीको विपद तथा आपतकालीन व्यवस्थापन प्राधिकरण (एएफएडी) ले भने ७ दशमलब ४ म्याग्निच्युडको भूकम्प गएको जनाएको छ ।
प्रारम्भिक तथ्यांकअनुसार टर्कीका अधिकारीलाई उदृत गर्दै बीबीसीले १७ जनाको मृत्यु भएको जनाएको हो ।
भूकम्पको धक्का राजधानी अंकाराका साथै छिमेकी मुलुक सिरिया, लेबनन, इजरायल र प्यालेस्टाइनसम्म महसुस भएको अन्तर्राष्ट्रिय समाचार संस्थाहरुले जनाएका छन् ।
पहिलो भकम्प गएको ११ मिनेटपछि ६ दशमलब ७ म्याग्निच्युटको अर्को भूकम्प गएको थियो । शक्तिशाली भूकम्पको धक्कापछि सानो सानो भकम्प लगातार गइरहेको टर्कीको विपद तथा आपतकालीन व्यवस्थापन प्राधिकरण (एएफएडी) ले जनाएको छ ।
भूकम्पबाट ५० भन्दा बढी भवनहरु भत्किएका र मुख्य रुपमा दुई वटा सहर बढी प्रभावित भएको जनाइएको छ । टर्कीका गृहमन्त्री सुलेमन सोयलुले भूकम्पबाट देशका दशवटा सहर प्रभावित भएको जानकारी दिएका छन् ।
कहरामनमारस, हटे, गाजियाँटेप, उस्मानिया, आदियामन, मालट्या, सनलिउर्फा, अदाना, दियारबकिर र किलिस बढी प्रभावित भएका छन् ।
सामाजिक सञ्जालमा पोस्ट भएका भिडियो तथा तस्बिरहरुमा थुप्रै भवनहरु भत्किएका देखिएका छन् भने भग्नावशेषमा फसेका मानिसहरुले गुहार मागिरहेको देखिएको छ । भूकम्पपछि मानिसहरु हिउँले ढाकिएको चिसो सडकमा बसिरहेका छन् ।
दक्षिणी सहर कहरामनमारस नजिक दश किलोमिटर गहिराइमा केन्द्रबिन्दु बनाएर भूकम्प गएको जर्मन रिसर्च सेन्टर फर जियोसाइन्सले जनाएको छ । भूकम्पले करिब एक मिनेटसम्म हल्लाको प्रत्यक्षदर्शीले बताएका छन् ।
टर्कीका राष्ट्रपति रेसेप तैय्यप अर्दोआनले भूकम्प प्रभावित क्षेत्रमा उद्धार तथा बचाउ कार्य सुरु भइसकेको जानकारी दिएका छन् ।
