काठमाडौं । प्रतिनिधिसभा तथा प्रदेशसभातर्फको मतगणना जारी रहँदा नेकपा एमालेले आफ्नो अग्रता कायमै राखेको छ ।
निर्वाचन आयोगले मंगलबार बिहान ९ बजेसम्म प्रविष्ट गरेको तथ्यांकअनुसार एमालेले २५ लाख ८४ हजार १९२ मत प्राप्त गरेको छ । एमालेले कांग्रेससँगको अन्तर बढाउँदै १ लाख ३२ हजार नघाएको छ । एमाले र कांग्रेसबीच १ लाख ३२ हजार १०९ मतको अन्तर रहेको छ । नेपाली कांग्रेसले २४ लाख ५२ हजार ८३ मत प्राप्त गरेको छ ।
नेकपा माओवादी केन्द्रले ११ लाख मत कटाएको छ । माओवादी केन्द्रले ११ लाख ६४७ मत ल्याउँदा राष्ट्रिय स्वतन्त्र पार्टीले १० लाख ७१ हजार २५९ मत प्राप्त गरेको छ ।
यस्तै, राष्ट्रिय प्रजातन्त्र पार्टीले पाँच लाख ५१ हजार १०७ र जनता समाजवादी पार्टी नेपालले ३ लाख ५७ हजार ४६४ मत ल्याएको छ ।
सिके राउत नेतृत्वको जनमत पार्टीले थ्रेस होल्ड कटाउन लागेको छ । उसले हालसम्म २ लाख ९९ हजार ७८३ मत ल्याएको छ । जनमत पार्टीलाई थ्रेस होल्ड पार गर्न २१७ मत मात्रै आवश्यक छ ।
एकीकृत समाजवादीले भने थ्रेस होल्ड कटाउन साढे ३५ हजार बढी मत ल्याउन आवश्यक छ । एकीकृत समाजवादीले हाल २ लाख ६४ हजार ४७२ मत पाएको छ । यस्तै नागरिक उन्मुक्ति पार्टीले २ लाख ४५ हजार २९१ मत प्राप्त गरेको छ।
