काठमाडौं । वन तथा वातावरणमन्त्री ऐनबहादुर शाही ठकुरीले चैत १५ गते राजावादी समूहले काठमाडौंको तीनकुनेमा गराएको हिंसात्मक घटनालाई सरकारले गम्भीर रुपमा लिएको भन्दै सत्यतथ्य सार्वजनिक गरिने बताउनुभएको छ ।
राजावादी समूहले कान्तिपुर टेलिभिजनको कार्यालयमा गरेको ढुंगामुढा र तोडफोडको निरीक्षण गर्न आज आउनुभएका वन तथा वातावरण मन्त्री शाहीले चैत १५ गतेको हिंसात्मक प्रदर्शनका दोषीलाई कारबाही गरिने बताउनुभएको हो । उहाँले सञ्चार प्रतिष्ठान, सरकारी कार्यालय, व्यापारिक भवन र निजी सम्पत्तिमा समेत राजावादीहरुले आन्दोलनका नाममा क्षति पुर्याएकोमा निन्दा गर्नुभयो । आगामी दिनमा यस्ता घटना हुन नदिन सरकार प्रतिबद्ध रहेको उहाँको भनाइ थियो ।
मन्त्री शाहीले घटनाको छानबिन प्रहरीले गरिरहेकाले न्यायिक समिति गठनतर्फ सरकार नलाग्नेसमेत जानकारी दिनुभयो ।
यसैबीच, वनमन्त्री शाहीले काठमाडौंको जडिबुटी उत्पादन तथा प्रशोधन कम्पनीको समेत निरीक्षण गर्नुभयो । यो कम्पनीमा चैत १५ गते राजावादी समूहले तोडफोड र आगजनी गरेको थियो ।
