रौतहट । जिल्ला अदालत रौतहटले जिल्लाको राजपुरमा भएको बमकाण्डका मुख्य आरोपी मोहम्मद अफताब आलमसहित चार जनालाई जन्मकैदको फैसला सुनाएको छ ।
गत २०६४ चैत २७ गते संविधानसभा निर्वाचनका बेला आलमका काका शेष इद्रिसिको गोठमा विस्फोट भएको थियो । सोही विस्फोटका घाइते तथा मृतकलाई इँटाभट्टामा लगेर जलाएको आरोपमा २०७६ असोज २६ गते आलम पक्राउ परेका थिए ।
उनीमाथि २०७६ कात्तिक १८ गते जिल्ला अदालत रौतहटमा विस्फोटक पदार्थको प्रयोग गरी ज्यान मार्ने उद्योग तथा कर्तव्य ज्यानसम्बन्धी कसुरमा मुद्दा दायर भएको थियो ।
थुनछेक बहसपछि जिल्ला अदालत रौतहटले उनीसहित बद्री सहनी, सेख सराजलगायत ४ जनालाई जन्मकैदको फैसला सुनाएको जिल्ला अदालत रौतहटका स्रेस्तेदार उद्धव ढोडारीले जानकारी दिनुभयो ।
