काठमाडौं । चार दल सम्मिलित समाजवादी मोर्चाको बैठक आज बिहान बस्दैछ । यसअघि हिजो (आइतबार) साँझ बस्ने भनिएको बैठक स्थगित भएपछि आज बिहान साढे ७ बजे बस्न लागेको हो ।
बैठक नेकपा (एकीकृत समाजवादी) को केन्द्रीय कार्यालय आलोकनगरमा बस्नेछ ।
एकीकृत समाजवादीका प्रवक्ता जगन्नाथ खतिवडाका अनुसार आजको बैठकमा सरकारका गतिविधि, समसामयिक राजनीतिक घटनाक्रमलगायत विषयमा छलफल हुनेछ । यसैगरी उक्त बैठकले मोर्चाका उद्देश्य जनतामाझ लैजान सातै प्रदेशमा गरिने सभाको मिति तोक्ने जनाइएको छ ।
प्रधानमन्त्री पुष्पकमल दाहालकी पत्नी सीता दाहालको निधन भएपछि मोर्चाको बैठक सरेको थियो । मोर्चा गठन भएको करिब तीन महिनापछि बस्न लागेको यो दोस्रो बैठक हो ।
गत असार ४ गते माओवादी केन्द्र, एकीकृत समाजवादी, जनता समाजवादी र नेत्रविक्रम चन्द नेतृत्वको नेपाल कम्युनिस्ट पार्टीले समाजवादी मोर्चा गठन गरेका थिए ।
