विराटनगर । कोशी प्रदेशको मुख्यमन्त्रीमा नेकपा एमाले संसदीय दलका नेता हिक्मतकुमार कार्कीले दाबी पेस गर्नुभएको छ । प्रदेश प्रमुख पर्शुराम खापुङले संविधानको धारा १६८ को उपधारा ५ अनुसार हिजो राति सरकार गठनको आह्वान गरेपछि एमाले र माओवादी केन्द्रका ५२ जना सांसदको समर्थनमा कार्कीले आज दाबी पेस गर्नु भएको हो ।
९३ सदस्यीय प्रदेशसभामा बहुमतका लागि ४७ मत चाहिन्छ । कार्कीलाई एमाले र माओवादी केन्द्रका ५२ सांसदको समर्थन छ । समर्थकको सनाखत गराएर प्रदेश प्रमुख खापुङले आजै मुख्यमन्त्री नियुक्त गर्ने तयारी छ । आजै समर्थनको सनाखत गर्ने तयारी गरेका एमाले र माओवादी केन्द्रले आफ्ना सांसदलाई बिहानै विराटनगर बोलाएका थिए ।
हिक्मतकुमार कार्की यसअघि दुई पटक मुख्यमन्त्री भइसक्नु भएको छ । २०७९ पुष २९ गते पहिलो पटक माओवादी केन्द्र, जसपा र राप्रपाको समर्थनमा मुख्यमन्त्री बन्नुभएका कार्कीले केन्द्रमा सत्ता समीकरण फेरिएपछि २०८० असार १४ मा राजीनामा दिनुभएको थियो । सर्वोच्च अदालतको परामादेशपछि २०८० भदौ २२ मा ठूलो दलको नेताको हैसियतमा मुख्यमन्त्री बनेका कार्कीले असोज २० मा फेरि राजीनामा दिनुभएको थियो । केन्द्रमा पुनः एमाले र माओवादी केन्द्रको गठबन्धन बनेपछि कार्की तेस्रो पटक मुख्यमन्त्री बन्न लाग्नु भएको हो ।
प्रदेश प्रमुख पर्शुराम खापुङले हिजो राति दुई दिनको समय दिएर संविधानको धारा १६८ को उपधारा ५ अनुसार सरकार गठनको आह्वान गर्नुभएको हो । असोज २७ मा केदार कार्की सरकार गठनको अन्तिम विकल्प उपधारा ५ अनुसार नै मुख्यमन्त्री नियुक्त हुनुभएको थियो । यसैबीच प्रदेश प्रमुखले नयाँ सरकार आह्वान गरेपछि कामचलाउ बनेका मुख्यमन्त्री केदार कार्कीले सर्वोच्च अदालत जाने तयारीमा हुनुहुन्छ ।
