काठमाडौं । राष्ट्रिय महिला भलिबल प्रतियोगितामा साबिक विजेता न्यू-डायमन्ड र एपीएफ क्लबले विजयी सुरुवात गरेका छन् । त्रिपुरेश्वरस्थित राष्ट्रिय खेलकुद परिषद्को कभर्ड हलमा आज भएको खेलमा एपीएफले विभागीय प्रतिद्वन्द्वी नेपाल पुलिस क्लबलाई चार सेटमा पराजित गरेको हो ।
मुख्य स्ट्राइकर उषा भण्डारी बिनाकोर्टमा उत्रिएको पुलिसले पहिलो सेटमा पछि परेको थियो । एपीएफले २५-२१ ले सेट जित्दै एक शून्यको अग्रता लिएको हो । दोस्रो सेटमा भने पुलिस खेलमा फर्कियो । ६ अंकको अग्रता लिएको एपीएफविरुद्ध उत्कृष्ट प्रदर्शन गरेको पुलिसले २५-२२ को जीत हात पारेको थियो । तर तेस्रो सेटमा भने सोही लयलाई निरन्तरता दिन नसक्दा एपीएफ हाबी भयो ।
यो सेट एपीएफले २५-१७ ले आफ्नो पक्षमा पार्दै पुनरागमन गरेको थियो । उसले चौथो सेट सहजै २५-१६ ले जितेको थियो । जीतसँगै एपीएफले तीन अंक जोड्यो । न्यु डायमन्डले त्रिभुवन आर्मी क्लबलाई चार सेटमानै हराएको हो । न्यु डायमन्डले आर्मीलाई २५-१२, २५-१५, १७-२५, २५-२१ को जीत हात पारेको हो ।
न्यू-डामयन्ड साबिक विजेता र एपीएफ उपविजेता हुन् । प्रतियोगितामा चार टिमको सहभागिता छ । राउन्ड रोविन लिगको आधारमा हुने खेलको शीर्ष दुइ टिमले उपाधिका लागि प्रतिस्पर्धा गर्नेछन् ।