काठमाडौं । म्यानचेस्टर सिटीले ब्राइटनमाथि चार-शून्य गोलको सहज जित हात पार्दै इङलिस प्रिमियर लिगको उपाधिको दौड बलियो बनाएको छ ।
गएराति ब्राइटनको मैदानमा भएको खेलमा सिटीले १७ औँ मिनेटमा केभिन डी-ब्रुयानको हेडर गोलमार्फत अग्रता लिएको थियो । प्रिमियर लिगमा उनको ६८ औँ गोल हो । २६ औँ मिनेटमा फिल फोडनले टिमका लागि दोस्रो गोल थपे । योसँगै उनले सिटीका लागि प्रिमियर लिगमा ५० गोल पनि पूरा गरे ।
क्लबका लागि यो सफलता हात पार्ने फोडन दशौं खेलाडी हुन् । ३४ औँ मिनेटमा फोडनले नै फेरी गोल गरेपछि घरेलु टोली पहिलो हाफमा तीन शून्यले पछि परेको थियो । ६२ औँ मिनेटमा युलियन अल्भारेजको गोलसँगै पेप ग्वार्डिवालाको टोली चार-शून्यको प्रभावशाली जित हात पार्न सफल भयो ।
सिटीको जीतपछि शीर्ष स्थानमा रहेको आर्सनल माथि दबाब परेको छ । आर्सनलको ३४ खेलबाट ७७ अंक छ । एक खेल कम खेल्दै दोस्रो स्थानमा रहेको सिटीको ७६ र तेस्रो स्थानको लिभरपुलको ३४ खेलबाट ७४ अंक छ ।
