विराटनगर । मुख्यमन्त्री केदार कार्कीलाई विश्वासको मत लिन निर्देशन दिन माग गर्दै नेकपा एमाले र माओवादी केन्द्रले कोशी प्रदेश सभामा दर्ता गराएको संकल्प प्रस्ताव बहुमतले पारित भएको छ ।
प्रदेश सभाको शुक्रबारको बैठकले संकल्प प्रस्ताव पारित गरेसँगै मुख्यमन्त्री केदार कार्कीले ३० दिनभित्र विश्वासको मत लिनुपर्नेछ । विश्वासको मत नलिए नयाँ सरकार गठनको तयारी थाल्न प्रदेश प्रमुखले आहृवान गर्नुहुनेछ । प्रस्तावमाथि भएको छलफलमा उठेका प्रश्नको जवाफ दिँदै मुख्यमन्त्री कार्कीले राजनीतिक स्थिरताको लागि सर्वदलीय सरकार बनाउन आहृवान गर्नुभयो ।
नेकपा एमाले र माओवादी केन्द्रले भने वैशाख २५ गतेसम्म मुख्यमन्त्री कार्कीले विश्वासको मत लिनुपर्ने बताएका छन् ।
सरकारका प्रवक्ता शमशेर राईले भने आफूहरू संविधानको पालना गर्नेगरी अगाडि बढिरहेको बताउनुभयो ।
गत चैत २६ गते मुख्यमन्त्री केदार कार्कीलाई दिएको समर्थन फिर्ता लिँदै ५२ सांसदले प्रदेश प्रमुखलाई निवेदन दिएका थिए । सोही दिन ५२ सांसदले नै प्रदेश सभाको अधिवेशन बोलाउन पनि प्रदेश प्रमुखलाई निवेदन दिएका थिए । सोहीअनुरूप बोलाइएको संविधानको धारा १८३ को उपधारा ३ बमोजिमको अधिवेशन अन्त्य भएको छ ।
