पर्यटन प्याकेज अभाव, प्रवर्द्धनमा सरकारको उदासीनताले पर्यटकको आगमन बढेन (रिपोर्ट)

पाल्पा । आन्तरिक तथा बाह्य मुलुकका पर्यटकका लागि प्रचुर सम्भावना भएको जिल्ला हो-पाल्पा । धार्मिक, ऐतिहासिक पुरातात्त्विक स्थलसँगै प्राकृतिक सम्पदाहरुले यहाँको आकर्षण बढाएको छ । पछिल्लो समय पर्यटकलाई आकर्षित गर्न तारे होटेल तथा अन्य पर्यटकीय गतिविधि चलायमान छन् । तर, पर्यटन प्याकेजको अभाव, प्रवर्द्धनमा सरकारको उदासीनता जस्ता कारणले पर्यटकको आगमन बढ्न सकेको छैन ।

रुपन्देहीको बेलहिया नाका भएर भारतीय तथा तेस्रो मुलुकका गरि वार्षिक चार लाख बढी पर्यटक नेपाल प्रवेश गर्छन् । भारतीय पर्यटन व्यवसायीको प्याकेजमा नेपाल आउने अधिकांश पर्यटक लुम्बिनी घुमेर फर्किन्छन् । त्यस्ता पर्यटकलाई प्याकेज बनाएर अन्य पर्यटकीय गन्तव्यमा पुर्याउन नेपालका पर्यटन व्यवसायी चुकेका छन् । पर्यटन प्याकेज बनाए पनि कारोबारका लागि अन्तर्राष्ट्रिय अनलाइन गेट वे नेपालमा छैन । नेपाल घुम्न आउने विदेशी पर्यटक अन्य मुलुकका एजेन्टको माध्यमबाट आउनुपर्ने बाध्यता रहेको पाल्पाका पर्यटन व्यवसायी लक्ष्मण बस्यालको भनाइ छ ।

लुम्बिनी घुम्न आउने आन्तरिक तथा बाहृय मुलुकका पर्यटकलाई पाल्पा जिल्लाका पर्यटकीय गन्तव्य स्थलसँग परिचित गराउन यहाँका स्थानीय सरकार र पर्यटन व्यवसायी प्रवर्द्धनमा जुटेका छन् । विशेष छुटसहितको पर्यटन प्याकेज बनाएर पर्यटकलाई आकर्षित गर्ने तयारी रहेको पर्यटन व्यवसायी सतिशराज शाक्यले जनाए ।

बुटवलदेखि ५० किलोमिटरको दूरीमा तानसेन छ । तराईको उखरमाउलो गर्मी छल्दै प्राकृतिक सौन्दर्यसँग रमाउन पाल्पालाई रमणीय गन्तव्यस्थल बनाउन सकिन्छ । मनमोहक श्रीनगर, ऐतिहासिक महत्त्व बोकेका रानीमहल र पाल्पा दरबार, धार्मिक तथा सांस्कृतिक विशेषता रहेको भैरव, ऋषिकेश तथा भगवती मन्दिरलगायत दर्जन बढी पर्यटकीयस्थल अवलोकन गर्न सकिन्छ । गन्तव्यसम्म पुग्न सहज सडक सन्जाल, पर्यटकीय स्थलहरुको साजसज्जा, पर्यटकलाई भुलाउन विभिन्न पर्यटकीय क्रियाकलापलगायत गतिविधि तयार पारेर पाल्पालाई पर्यटकको गन्तव्य बनाउन आवश्यक छ ।