काठमाडौं । काभा पुरुष भलिबल क्लब च्याम्पियनसिप २०२४ को उपाधि भारतको क्यालिकट हिरोजले जितेको छ । त्रिपुरेश्वरस्थित राष्ट्रिय खेलकुद परिषद् राखेपको कवर्ड हलमा आज सम्पन्न फाइनल खेलमा नेपालको हेल्प नेपाल स्पोर्ट क्लबलाई हराउँदै क्यालिकट च्याम्पिन बनेको हो ।
भारतीय प्राइम भलिबल लिग च्याम्पियन क्यालिकटले नेपालको एनभीए लिग च्याम्पियन हेल्प नेपाललाई चार सेटमा पराजित गर्यो । आक्रमाणमा निकै उत्कृष्ट देखिउको क्यालिकटविरुद्ध हेल्प नेपालको डिफेन्स र ब्लग चल्न सकेन । पहिलो सेटमा २५-२१ को जित हात पारेको क्यालिकटले प्रतिस्पर्धात्मक दोस्रो सेट २४-२६ ले गुमाएपछि खेल खेल १-१ को बराबरी अवस्थामा पुगेको थियो ।
तर, त्यसपछिका दुई सेटमा उत्कृष्ट पुनरागमन गरेको क्यालिकटले हेल्प नेपालविरुद्ध एकतर्फी जित हात पार्यो । भ्रमण टोलीले तेस्रो सेट २५-१४ र चौंथो सेट २५-१७ ले जित्दै पहिलो संस्करणको काभा पुरुष भलिबल क्लब च्याम्पियनसिपको उपाधि आफ्नो नाममा गर्यो । लिग चरणको खेलमा हेल्प नेपालले क्यालिकटलाई ५ सेटमा पराजित गरेको थियो । भारतीय टोलीले सोही हारको बदला लिँदै च्याम्पियनसिप उचालेको हो ।
क्यालिकट लिग चरणमा तेस्रो र हेल्प नेपाल दोस्रो हुँदै सेमिफाइनलमा पुगेका थिए । सेमिफाइनलमा क्यालीकटले इरानलाई र हेल्प नेपालले माल्दिभ्सको क्लब एचडीसीलाई हराएको थियो । इरानको अन्डर- १८ टोलीले प्रतियोगिताको तेस्रो स्थान हासिल गर्यो । माल्दिभ्सको क्लब एचडीसीलाई सोझो सेटमा हराउँदै इरानी टोली तेस्रो भएको हो । प्रतियोगितामा ५ टोलीको सहभागिता रहँदा नेपालको गण्डकी प्रदेश प्रतियोगिताको लिग चरणबाटै बाहिरिएको थियो ।
