काठमाडौं । अन्तर्राष्ट्रिय क्रिकेट काउन्सिल आईसीसीको बोर्ड बैठकमा च्याम्पियन्स ट्रफी हाइब्रिड मोडेलमा गर्ने प्रस्ताव अघि सारिने भएको छ । अर्को हप्ताको लागि बोलाइएको बैठकको लागि च्याम्पियन्स ट्रफीको मात्रै एजेन्डा समावेश गरिएको छ।
च्याम्पियन्स ट्रफी सन् २०२५ मा पाकिस्तानमा आयोजना हुने निर्धारण भएको छ । तर भारतले पाकिस्तान भ्रमण नगर्ने भएपछि यो प्रतियोगिताको भाविष्य निर्धारणको लागि आईसीसीको बैठक बस्न लागेको हो।
नोभेम्बर २६ को बैठकमा हाइब्रिड मोडेलमा प्रतियोगिता गर्न प्रस्ताव गरिने छ । यो मोडेलमा प्रतियोगिता आयोजक पाकिस्तानबाहेक अन्य कुनै एक विदेशी भूमिमा पनि खेल आयोजना गरिनेछ । यता पाकिस्तानी क्रिकेट बोर्डले भने प्रतियोगिताको बारेमा आईसीसीबाट नयाँ सूचना नआएको जानकारी दिएको छ ।
सो बैठकमा १२ पूर्ण सदस्य देशका प्रतिनिधि समावेश हुनेछन्। आईसीसी अध्यक्ष र प्रमुख कार्यकारी अधिकृत रहने बैठकमा एसोसिएट देशका प्रतिनिधि पनि समावेश हुनेछन्। भारतको क्रिकेट बोर्ड बिसीसीआईले आईसीसीलाई रोहित शर्माको कप्तानीमा रहेको भारतीय टिमको पाकिस्तान भ्रमणलाई भारतीय सरकारले अनुमति नदिएको जानकारी दिएको छ । त्यसपछि आईसीसीको बैठक बस्न लागेको हो।
पाकिस्तानले तीन वर्ष अघि नै यो प्रतियोगिता आयोजना गर्ने जिम्मेवारी पाएको थियो।
