काठमाडौं । रश्मी कुमारि घिसिङले मात्र पाँच गोल गरेपछि विभागीय टिम एपीएफ क्लबले बागमती युवा क्लबलाई ७-० को फराकिलो अन्तरले हराएको छ । सातदोबाटोको एन्फा कम्प्लेक्समा भइरहेको लिगमा एपीएफले लिग चरणमा अपराजित यात्रा गरेको छ । बागमती भने शीर्ष पाँचमा पर्न असफल भयो ।
एपीएफले पहिलो गोलका लागि ३५ मिनेट पर्खिनु परेको थियो । निरन्तरको वर्षाले प्रभावित भएको खेलमा अनिता केसीले गोलकिपर छक्याएर दिएको पासमा रश्मीले डेडलक तोडेकी हुन् । पहिलो गोल भएका पाँच मिनेटमा नै एपीएफले दोस्रो गोल गर्यो । अनिता बस्नेतको लामो क्रसमा रश्मीले हेडर गरिन्।
उनको हेडर बल सुनिता भुलनबाट डिफ्लेक्ट भएर पोस्टमा छिरेको थियो । पहिलो हाफमा दुई गोल गरेको एपीएफले दोस्रो हाफको सुरुआतबाट नै गोल गर्यो । ४७ औं मिनेटमा कप्तान अनिता बस्नेतले टिमका लागि तेस्रो गोल गरिन् ।
दिव्या यस्माली मगरले ह्यान्ड बल गरेपछि रेफ्री प्रज्वल क्षेत्रीले एपीएफलाई पेनाल्टीको अवसर दिएका थिए । पेनाल्टीको अवसरमा रश्मीले ह्याटि्रक पूरा गरेकी थिइन् ।
रश्मीले चौथो गोल ८२ औं मिनेटमा र ८८ औं मिनेटमा पाँचौं गोल गरिन् । एपीएफको लागि फाइनल गोल भने सविता राना मगरले इन्ज्युरी समयमा गरिन् । प्रिती राईले दिएको पासमा सविताले फिनिसिङ टच दिएकी थिइन् । आज पाँच गोल गरेकी रश्मी जारी महिला लिगमा शीर्ष गोलकर्ता हुन् ।
उनले नौ खेलमा १८ गोल गरेकी छन् । बाँकी खेलाडीले दोहोरो अंकमा गोल गर्न सकेनन् । एपीएफले भने नौ खेलबाट ८ जित र एक बराबरीसँगै २५ अंक जोड्यो । पराजित बागमती १० अंकका साथ छैटौं स्थानमा रह्यो।
