काठमाडौं । एएफसी अन्डर-ट्वेन्टी एसियन कप छनोटको आफ्नो अन्तिम खेलमा नेपाल पराजित भएर बाहिरएको छ । न्यू ताइपे सिटीस्थित, फू जेन क्याथोलिक युनिभर्सिटी स्टेडियममा नेपाल बहराइनसँग ४-० ले पराजित भएको हो ।
खेलको २७ औं मिनेटमा नै नेपालले पहिलो गोलको सामना गर्न पुग्यो। सामी बसम अड्वाईले फ्रि-किकमा गरेको प्रहार सिधै पोस्टभित्र छिरेको थियो । उनको प्रहार नेपाली गोलकिपर जियारत शेखले भेट्न सकेनन् । पहिलो हाफको अन्तिममा बहिराइनले अग्रता दोब्बर बनायो ।
इन्ज्युरी समयमा बहराइनका खलिद अलखलिफले सेट पिसमा गोल गरे । यसपटक पनि शेखले गलत दिशामा डाइभ गर्दा नेपालले गोलको सामना गरेको हो । पहिलो हाफमा नै नेपाल दुई-शून्यले पछि पर्यो । सामीले खेलको ७३ औं मिनेटमा पनि गोल गरे ।
नेपालविरुद्ध ८४ औं मिनेटमा अलि अहमदले गोल गरेपछि एसियन कपको छनोट नजिक पुगेको हो । उसको छनोट हुने सम्भावना अब पर्सी हुने उज्वेकिस्तानसँगको खेलको नतिजाले निर्धारण गर्नेछ । यता नेपालले भने चारमध्ये एक खेलमा मात्र जित निकाल्न सक्यो।
उर्जन श्रेष्ठको टोली पहिलो खेलमा कम्बोडियासँग ४-१ ले पराजित भएको थियो । दोस्रो खेलमा समिर तामाङले ह्याट्रिक गरेपछि चाइनिज ताइपेलाई ३-१ ले पराजित गरेको नेपालले तेस्रो खेलमा उज्वेकिस्तानसँग ६-० को फराकिलो अन्तरले पराजित भएको थियो । बहराइनले पहिलो खेलमा चाइनिज ताइपेलाई १-० ले हराउँदा कम्बोडियासँग पराजित भएको थियो ।
आजको खेलसँगै बहराइन, उज्वेकिस्तान र कम्बोडियाको समान ६-६ अंक भएको छ । समूहको विजेता र उत्कृष्ट ६ उपविजेताले फाइनल अन्डर ट्वेन्टी एसिया कपमा स्थान बनाउने छन्।
