काठमाडौं । युरोपा लीगको आफ्नो पहिलो खेलमा सातौं मिनेटमा १० खेलाडीमा झरे पनि इंग्लिस क्लब टोटनहमले क्वाराबागमाथि प्रभावशाली जित हात पारेको छ ।
टोटनहमले अजरबैजानको क्वाराबागलाई ३-० गोल अन्तरले पराजित गरेको हो । यात्रा अवरोधका कारण टोटनहम हटस्पर स्टेडियममा खेल ३५ मिनेट ढिलो सुरु भएको थियो । ७ औं मिनेटमा डिफेन्डर राडु ड्रागुसिनले वान-अन वानमा जुनिन्होलाई च्यालेञ्ज गरेपछि सीधा रातो कार्ड देखाउँदा घरेलु टोलीलाई प्रारम्भिक झटका लागेको थियो ।
त्यसका बाबजुद ५ मिनेटपछि डोमिनिक सोलाङ्केको सहयोगमा ब्रेनान जोन्सनले गोल गर्दै टोटनहमलाई सुरुवाती अग्रता दिलाए ।
लूज बललाई नियन्त्रण गर्दै पेपे सरले ५२औं मिनेटमा गोल गरेपछि घरेलु टोलीले अग्रता दोब्बर पार्यो । ६८औं मिनेटमा सोलाङ्केले गोल गरेपछि टोटनहमले विजयी सुरुवात गर्यो । पहिलो खेलबाट ३ अंक जोडेको टोटनहम युरोपा लीगको चौथो स्थानमा छ । पराजित क्वाराबाग ३६ टोली सहभागि प्रतियोगिताको ३५ औं स्थानमा छ । अन्य खेलमा लियोनले ओलम्पियाकोस एफसीलाई २-० ले पराजित गर्यो । त्यस्तै रोमा र एथलेटिक बिलबाआले १-१ को बराबरी खेले ।
