काठमाडौं । एसिया कपअन्तर्गत आज भएको खेलमा श्रीलंकाले मलेसियालाई १ सय ४४ रनको फराकिलो अन्तरले पराजित गरेको छ । श्रीलंकाको जितमा कप्तान चामरी अथापट्टुले शतक प्रहार गरिन् ।
रागिंरी दाम्बुला इन्टरनेसल स्टेडियममा टस जितेर ब्याटिङ गरेको घरेलु टोलीले २० ओभरमा चार विकेट गुमाएर १ सय ८४ रनको योगफल बनाएको थियो । ओपनर भिस्मी गुणारत्ने एक रनमै आउट भएकी थिइन् । तर अर्की ओभर चामरीले ६९ बलमा १ सय १९ रनको अविजित इनिङस खेलिन् । उनले १४ चौका र ७ छक्का प्रहार गरिन् । चामरीको टी-ट्वेन्टी आइमा करियरको यो उत्कृष्ट इनिङस हो । विनफ्रेड दुराइसिंगले दुई विकेट लिइन् ।
जवाफमा मलेसिया १९ ओभर ५ वलमा ४० रनमा अल आउट भयो । एल्सा हन्टरले १० रन बनाइन् । बाँकी कुनै पनि खेलाडीले दोहोरो अंक बनाउन सकेनन् । सासिनी गिम्हानीले तीन तथा कया काभिन्दी र काभिसा दिलहरीले दुई-दुई विकेट लिए ।
जारी प्रतियोगितामा लगातार दोस्रो जित हात पारेको श्रीलंका चार अंकका साथ समूह बीको शीर्ष स्थानमा छ । मेलसिया जितविहीन छ ।
