काठमाडौं । संघ र प्रदेश सरकारबीच फागुन २१ गतेका लागि तोकिएको निर्वाचन सफल बनाउन मिलेर अघि बढ्ने सहमति भएको छ।
सरकारले चुनावमा सघाउन आग्रह गरेपछि मुख्यमन्त्रीहरूले भने सुरक्षासहितको वातावरण बनाउन सुझाव दिए । जेन-जी आन्दोलन र त्यसपछिका घटनाक्रम तथा सरकार परिवर्तनपछिको अवस्थाबारे प्रधानमन्त्री निवास बालुवाटारमा भएको छलफलमा सातै प्रदेशका मुख्यमन्त्रीहरूको सहभागिता थियो । प्रधानमन्त्री सुशीला कार्कीले प्रदेश सरकार र राजनीतिक भूमिकाको हिसाबले पनि चुनाव सफल बनाउन मुख्यमन्त्रीहरूको सहयोग अनिवार्य हुने बताउनुभएको थियो ।
मुख्यमन्त्रीहरूले निर्वाचनमा जानुको विकल्प नभए पनि प्रमुख चुनौती शान्ति सुरक्षाको विषय रहेकाले यसमा गम्भीरतासाथ लाग्नुपर्नेमा जोड दिनुभयो । जेन-जी आन्दोलन र त्यसपछिका घटनाक्रममा क्षति पुगेका संरचना पुनःनिर्माणका लागि संघ सरकारले नै प्याकेज ल्याउनुपर्ने सुझाव उहाँहरूको थियो ।
यस्तै मुख्यमन्त्रीहरूले खर्च कटौतीका लागि संघीय सरकारले गरेको परिपत्रले प्रदेश सरकारको क्षेत्राधिकारमा हस्तक्षेप गर्न खोजेको हो कि भन्ने आशंका उत्पन्न भएको पनि बताउनुभयो।
